नुकताच रांगायला आणि पाऊले टाकायला शिकलेल्या तसेच दोन दिवसांवर पहिला वाढदिवस आलेल्या चिमुरड्याचा घरात खेळता-खेळता पाण्याच्या बादलीत पडून दुर्दैवी अंत झाला.
वाकड - नुकताच रांगायला आणि पाऊले टाकायला शिकलेल्या तसेच दोन दिवसांवर पहिला वाढदिवस आलेल्या चिमुरड्याचा घरात खेळता-खेळता पाण्याच्या बादलीत पडून दुर्दैवी अंत झाला. ही मन हेलावून टाकणारी घटना गुरुवारी (ता. २) दुपारी तीनच्या सुमारास थेरगाव येथील धनगर बाबा मंदीरा मागे समता कॉलनीत घडली. याबाबत वाकड पोलिसांनी आकस्मिक मृत्यूची नोंद केली आहे.
मोहंम्मद फैसल मोहंम्मदतारीक पठाण (वय ११ महिने) असे मृत्यू झालेल्या दुर्दैवी बालकाचे नाव आहे. याबाबत माहिती अशी, मूळचे उत्तर प्रदेशचे पठाण कुटुंबीय गेल्या अनेक वर्षांपासून समता कॉलनीत भाड्याच्या सिंगल खोलीत राहतात. गुरुवारी दुपारी जेवणानंतर मोहंम्मदचे आई-वडील झोपले असता मोहंम्मदची मात्र घरात धडपड सुरूच होती. त्याच्याकडे आईचे लक्ष असल्याने मोरीत गेलेल्या मोहंमदला त्यांनी दोन वेळा पुन्हा अंथरुणावर आणून झोपवले.
काही वेळ तो आईसोबत शांत झोपल्याने त्याच्या आईलाही डुलका लागला आणि घात झाला. मोहंमदला जाग आल्याने तो थेट मोरीत घुसला. पाणी भरलेल्या बादलीशी खेळता-खेळता तो बादलीत डोक्यावर उलटा पडला. नाका तोंडात पाणी जाऊन श्वास गुदमरल्याने त्याचा करूण अंत झाला.
काही क्षणातच खडबडून जाग्या झालेल्या त्याच्या आईने समोरील चित्र पाहून हंबरडा फोडला. त्याला तात्काळ थेरगाव रुग्णालयात दाखल केले मात्र डॉक्टरांनी त्याला मृत घोषित केले. मोहंम्मदला एक तीन वर्षांचा मोठा भाऊ आहे. पठाण कुटुंबियांनी या दोघां भावांच्या मुंजेचा (खतना) सोमवारीच (ता. २७) मदरशात कार्यक्रम करून सर्वांना जेवण दिले होते. तर मयत मोहंम्मद याचा शनिवारी (ता. ४) पहिला वाढदिवस होता. गोरा गोमटा आणि सुंदर असलेला मोहंम्मद गल्लीत सर्वांचा लाडका होता.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.