Wakad Rain Update : वाकडमधील रस्त्यांवर पाणी अन वाहतूक कोंडी; नागरिकांत समाधान

वाकड : थेरगाव, वाकड, हिंजवडी परिसरात शनिवारी (ता. २४) सकाळपासूनच आभाळ भरून आल्याने काहिसा काळोख पसरला होता. साडे दहाच्या सुमारास पावसाची रिमझिम सुरू झाली.

अर्ध्या तासाने ही रिमझिम थांबली आणि थेट एकच्या सुमारास जोरदार पावसाला सुरुवात झाली. तब्बल पाऊण तास धो-धो बरसणाऱ्या या पावसामुळे या भागातील रस्त्यावर जागोजागी पाणीच पाणी जमा झाल्याचे चित्र होते.

डांगे चौक हिंजवडी रस्त्यावरील कस्तुरी चौकात विनोदे नगरकडे जाण्याच्या रस्त्यावर दीड फूट पाणी जमा झाले होते या तळ्यातून वाट शोधताना वाहनचालकांना कसरत करावी लागत असल्याने काही प्रमाणात येथे वाहतूक कोंडी झाली होती.

भूमकर चौक भुयारी मार्गात नेहमी प्रमाणे पाणी साठल्याने वाहनांच्या रांगा लागून वाहतूक कोंडी झाली होती. त्यानंतर पावसाने विश्रांती घेत पुन्हा सायंकाळी साडे पाचच्या सुमारास आगमन केल्याने वातावरणात गारवा पसरला होता. मात्र मोठ्या प्रतिक्षेनंतर पावसाने लावलेल हजेरी अन सर्वांची उकाड्यातून केलेली सुटका यामुळे नागरिकांनी समाधान व्यक्त केले.