Aai Kuthe Kay Karte: "आशुतोषचं जाणं अनेकांना आवडलं नाहीये..."; 'आई कुठे काय करते'मधील मधुराणीची भावूक पोस्ट

Aai Kuthe Kay Karte: छोट्या पडद्यावरील आई कुठे काय करते (Aai Kuthe Kay Karte) या मालिकेत विविध ट्विस्ट येत असतात. काही दिवसांपूर्वी या मालिकेत मोठा ट्विस्ट आला आहे. अरुंधतीचा दुसरा पती आशुतोषचं निधन झालं आहे. त्यामुळे आता अरुंधतीवर दु:खाचा डोंगर कोसळला आहे. मालिकेत अरुंधती ही भूमिका साकारणाऱ्या अभिनेत्री मधुराणी प्रभुलकर (Madhurani Gokhale Prabhulkar) यांनी मालिकेतील या ट्विस्टबाबत नुकतीच एक पोस्ट शेअर केली आहे. या पोस्टमध्ये मधुराणी यांनी आशुतोषसोबतचे काही फोटो शेअर केले आहेत. या फोटोला त्यांनी दिलेल्या कॅप्शननं अनेकांचे लक्ष वेधले आहे.

मधुराणी यांची पोस्ट

मधुराणी यांनी आशुतोषसोबतचे फोटो शेअर करुन कॅप्शनमध्ये लिहिलं, "मधले काही दिवस कोणतीही पोस्ट करायच्या मनस्थितीमध्ये नव्हते त्यामुळे ही उशीराने डकवतेय.आशुतोषचं 'जाणं ' अनेकांना आवडलं नाहीये...कसं आवडेल.... ! आयुष्यात घडणाऱ्या अप्रिय घटना आवडत नाहीतच आपल्याला, पण स्वीकाराव्या लागतातच. तसंच आशुतोष जाणं आपल्याला स्वीकारावं लागेल."

"गेले अनेक दिवस दुखवट्याचे सीन्स करते आहेत. 12/13 तास सलग असे काही दिवस रडते आहे. ! अभिनय अभिनय म्हंटलं तरी तुमच्यातला एक भाग तुम्ही ओतता, काही पणाला लावता तेव्हाच तो खरा वाटतो. हे काही दिवस प्रचंड थकवणारे होते इतके की त्याचा काही प्रमाणात तब्येतीवरही परिणाम झालाच. डेलीसोपमध्ये भावनिक व्यवस्थापन करण्यासाठी बऱ्याचदा वेळ मिळत नाही (unwind होण्यासाठी ) आणि त्याचे परिणाम दिसून येतात.", असंही मधुराणी यांनी कॅप्शनमध्ये लिहिलं.

मधुराणी यांनी पुढे पोस्टमध्ये लिहिलं, "अरुंधती आशुतोषला मिस करतेय तशीच आम्हाला सगळ्यांना ओंकारची तितकीच आठवण येतेय. ओंकार, आपल्या फालतू पासून गंभीर विषयावरच्या गप्पा, 90s ची गाणी मोठमोठ्याने गाणं, विषय कुठलाही असो त्यातलं तुला सखोल माहीत असणं, आणि आजूबाजूचं वातावरण हसतखेळत ठेवायचं तुझं कसब हे सगळं मिस होतंय. पुढे परत काम करूच!! पण हा प्रवास कायम स्मरणात राहील!"