Johny Lever: 13 व्या वर्षी केला होता आत्महत्येचा प्रयत्न, जॉनी यांचा अंगावर काटा आणणारा किस्सा

Bollywood Entertainment News: अभिनेते जॉनी लिव्हर यांचा आज 14 ऑगस्टला वाढदिवस आहे. कॉमेडी किंग म्हणून जॉनी यांनी बॉलिवूडमध्ये स्वतःची वेगळी ओळख कमावली. इंडस्ट्रीमधील जवळपास प्रत्येक दिग्गज कलाकाराबरोबर जॉनी यांनी काम केलं. आज बॉलिवूडमधील दिग्गज कलाकारांच्या यादीत जॉनी यांचं नाव घेतलं जातं.

जॉनी यांनी बॉलिवूडमध्ये येण्यापूर्वी खूप हलाखीचं आयुष्य जगलं आहे. त्यांचं बालपण झोपडपट्टीमध्ये गेलं. लहानपणी ते रस्त्यावर पेन विकायचे. त्यांनी दारूच्या गुत्त्यावर सुद्धा काम केलं आहे. काही महिन्यांपूर्वी दिलेल्या एका मुलाखतीमध्ये त्यांनी लहानपणी आत्महत्येचा प्रयत्न केला होता असा खुलासा केला.

काही काळापूर्वी त्यांनी रणवीर अलाहाबादिया च्या युट्युब चॅनेलला मुलाखत दिली. यावेळी ते म्हणाले की, "जेव्हा मी लहान होतो तेव्हा माझा आयुष्य खूप अडचणींनी भरलेलं होतं. मी काम केलं तरच घरी जेवण शिजायचं. माझे वडील जेव्हा जेव्हा दारू प्यायचे तेव्हा तेव्हा त्यांचे शुद्ध हरपायची. ते एके काळी कुख्यात गुंड होते. त्यांची हत्यार किती वेळा मी फेकून दिली आहेत."

पुढे ते म्हणाले, "या सगळ्याला कंटाळून मी तेरा वर्षाचा असताना रेल्वे ट्रॅक वर जाऊन आत्महत्येचा सुद्धा प्रयत्न केला होता. मी माझ्या वडिलांच्या वागण्याला कंटाळलो होतो. मी रेल्वे ट्रॅक वर चालत होतो आणि समोरून ट्रेन येत होती. तेव्हाच मी ट्रॅक ओलांडला आणि ट्रेन निघून गेली. माझ्या डोळ्यांसमोर तेव्हा माझ्या तीनही बहिणींचे चेहरे आले. जे मला विचारत होते, तू गेल्यावर आमचं कसं होईल?"

"पण या सगळ्या आत्महत्येच्या विचारातून मला फक्त संगीताने बाहेर यायला मदत केली. संगीत त्यावेळी मला खूप आवडायचं. लहान असताना मी आमच्या इथे असलेल्या सलूनच्या दुकानाच्या बाहेर बसायचो जिथे रेडिओवर गाणी लागलेली असायची. ती गाणी मी ऐकायचो. संगीत हे कायमच मला मदत करत आले आणि त्यानेच मला आता उभं केलं." अस त्यांनी सांगितलं.

जॉनी यांनी त्यानंतर काही काळ संगीत क्षेत्रात काम केलं. त्यावेळी ते ऑर्केस्ट्रा मध्ये कॉमेडी ही करायचे. तिथूनच त्यांना पुढे बॉलीवूडमध्ये ब्रेक मिळाला आणि आज ते बॉलिवूडमध्ये एक आघाडीचे कॉमेडी अभिनेते आहेत.