Tejaswini Pandit : "नुसते कायदे कडक असून चालत नाही..." बलात्कार प्रकरणात न्यायासाठी तेजस्विनीची मागणी

Badlapur School Case : कोलकाता येथील महिला डॉक्टरवर बलात्कार होऊन तिची हत्या करण्यात आली. या प्रकरणाच्या काही दिवसानंतरच बदलापुर येथील दोन चिमुरडींवर लैंगिक अत्याचार झाल्याची घटना घडलीय. या सगळ्यात सोशल मिडीयावर महिलांच्या सुरक्षेविषयी आणि या प्रकरणावर अनेक जण व्यक्त होताना दिसत आहेत. मनोरंजन विश्वातील कलाकार मंडळी मोठ्या संख्येने या दोन्ही प्रकरणावर व्यक्त होताना दिसत आहेत. सोशल मिडीयावर अनेक कलाकार न्यायासाठी आणि आरोपींना शिक्षा मिळाव्या याबाबत पोस्ट करत आहेत. हिंदीसह मराठी कलाकारही मोठ्या संख्येने सोशल मिडीयाच्या माध्यामातून मतं मांडताना दिसत आहेत.

अभिनेत्री तेजस्विनी पंडितही कायम महत्त्वाच्या घडामोडींवर तिचं परखड मत मांडण्यासाठी ओळखली जाते. सध्याच्या बलात्कार प्रकरणावर होणारं राजकारण आणि कायदा यावर तेजस्विनीने मत मांडलय.

तेजस्विनीने तिच्या सोशल मिडिया इ्न्स्टाग्राम अकाउंटवर पोस्ट शेयर केलीय. या स्टोरी पोस्टमध्ये तेजस्विनी लिहीते की, "बलात्कार किंवा लैंगिक अत्याचार करणाऱ्याला जातपात, धर्म नसतो... फक्त वृत्ती असते आणि तीच ठेचली पाहिजे. ज्यासाठी जाच बसणं गरजेचं आहे. नुसते कायदे कडक असून चालत नाही, ते आपल्याकडे आहेतच... अंमलात कधी आणायचे ?"

असं म्हणत तेजस्विनीने व्यवस्थेला जाब विचारलाय. शिवाय बलात्कारासारख्या प्रकरणावरुन राजकारण करणाऱ्यांना देखील एक विनंती केलीय. तेजस्विनी या पोस्टमध्ये पुढे लिहीते की, "आणि सगळ्यांना एक मनापासून विनंती, कृपया बलात्कारासारख्या घृणास्पद कृत्याचं कुठल्याही पद्धतीने राजकारण करु नये."

या पोस्टमध्ये शेवटी हॅशटॅग निषेध असं लिहीत तिने डिमांड जस्टीस असही लिहीत न्यायाची मागणी केलीय. शिवाय व्यवस्थेलाही तेजस्विनीने जाब विचारला आहे.तेजस्विनीसह अनेक कलाकार आता सोशल मिडीयावर व्यक्त होताना दिसत आहेत. अनेक कलाकारांनी कोलकाता आणि बदलापुर प्रकरणावर संतापजनक प्रतिक्रिया दिल्या आहेत.

अभिनेते प्रसाद ओक, रितेश देशमुख, सोनाली कुलकर्णी, अभिजीत केळकर, प्रिया बापट, मृण्मयी देशपांडे यांच्यासह अनेक कलाकार सध्याच्या प्रकरणावर न्याय मिळावा यासाठी सोशल मिडीयावर व्यक्त होत आहेत. फक्त कलाकारच नाही तर विविध क्षेत्रातील मंडळी आणि सामान्य जनताही सोशल मिडीयावर या प्रकरणावर त्यांची मतं मांडताना दिसत आहेत.