Alyad Palyad: सिनेमाच्या घवघवीत यशानंतर नवोदित अभिनेत्याने उलगडला त्याचा यशाचा प्रवास...

इयत्ता चौथीपासूनच मी अभिनयाला सुरुवात केली होती. तेव्हापासूनच मी अभिनयाचे प्रशिक्षण घेत आलो आहे. अश्विनी तोले नावाच्या माझ्या एक शिक्षिका होत्या. त्यांनी मला अभिनयाचे प्रशिक्षण दिले होते. तीन वर्षे मी त्यांच्याकडे प्रशिक्षण घेतले. त्यानंतर मी नृत्याकडे वळलो आणि मग माझी दहावीची परीक्षा झाली. त्यानंतर दोन-तीन महिन्यांच्या सुटीत मी अभिनयाकडे लक्ष देण्याचे ठरवले. माझ्या घरातील सगळेच सतत म्हणायचे की तू अभिनय क्षेत्रात चांगले काम करू शकतोस. खरेतर माझ्या कुटुंबाने मला यात खूप मदत केली. त्यानंतर अकरावी आणि बारावी करत असतानाच माझ्या कुटुंबाने मला अभिनय क्षेत्रात प्रशिक्षण घेण्याची परवानगी दिली आणि मी अॅक्टिंगमध्ये डिप्लोमा करायला सुरुवात केली. त्यादरम्यान माझी ओळख प्रीतम सरांसोबत झाली. त्यांच्याकडे तीन महिने अभिनय शिकलो आणि त्यानंतर मी चित्रपटसृष्टीत आलो.

चलबिचल तशी खूपच होती. कारण 'अल्याड पल्याड'मध्ये आमचे पहिले शूट डान्सचे होते. डान्सच्या बाबतीत माझ्यात आत्मविश्वास चांगला होता. त्यामुळे मला माहीत होते, की मी डान्स छान करू शकतो; पण कॅमेऱ्याचा सामना करण्याची पहिलीच वेळ असल्यामुळे थोडी घाबरगुंडी उडाली होती. तेथे बरेच लोकही होते. खूप बॅकग्राऊंड डान्सर होते. कोरिओग्राफर होते आणि पहिले शूट माझे एकट्याचे होते. त्यामुळे जरा घाबरलो होतो; पण त्यानंतर मी सेट झालो आणि खूप छान शूट झाले व ते तुम्ही चित्रपटात पाहिलेच असेल. काम करताना खूप मजाही आली.

कुठल्याही नवोदित कलाकारासाठी इतक्या लवकर चित्रपटाची संधी मिळणे खूप मोठी आणि खूप अवघड गोष्ट असते. ती संधी मला मिळाली. जेव्हा मी हे ऐकले तेव्हा मला आश्चर्याचा धक्का बसला. मी आधी ऑडिशनदेखील दिली होती. त्यामुळे संधी मिळेल किंवा नाही, अशी मनात भीती होती; पण जेव्हा पुन्हा ऑडिशन झाली आणि प्रीतम सर म्हणाले, की तुझी यात मुख्य भूमिका असेल... ते ऐकताच मी खूप भावूक झालो होतो. कारण इतक्या मोठ्या कलाकारांसोबत मोठ्या पडद्यावर काम करण्याची संधी मिळणे ही खूपच मोठी गोष्ट होती. मकरंद देशपांडे, गौरव मोरे, सक्षम कुलकर्णी, सुरेश विश्वकर्मा या सगळ्यांसोबत काम करण्याची संधी मिळाली आणि माझ्या पहिल्याच चित्रपटाला भरभरून प्रतिसाद मिळाला, ही माझ्यासाठी खूप आनंदाची बाब आहे.

खरे सांगायचे तर पहिल्या चित्रपटाला एवढे यश मिळाले त्याबद्दल मी खूप खुश आहे. आम्ही जी मेहनत घेतली त्या मेहनतीला प्रेक्षकांनी इतका चांगला प्रतिसाद दिला. आमच्या मेहनतीचे चीज झाले असे मी म्हणेन. कारण मराठी चित्रपटसृष्टीत एक नवीन प्रकारात मोडणारा हा चित्रपट होता. त्याला यश मिळाले याचा आनंद खूप आहे. आता तर या चित्रपटाच्या दुसऱ्या भागाचीही घोषणा झाली आहे. त्यामुळे खूप छान वाटत आहे. या चित्रपटात काम करण्यासाठी मी आतुर आहे.

पहिली गोष्ट म्हणजे कुठल्याही नवोदित कलाकाराला जर पहिल्या चित्रपटाची संधी मिळणार असेल, तर तो मुळातच सोडणार नाही; पण मी असे मानतो की हे खूप छान झाले की मला हॉरर-कॉमेडी जॉनरचा चित्रपट मिळाला. कारण, लव्हस्टोरी तर प्रेक्षकांना खूप बघायला मिळतात. आपण काय नवीन देऊ शकतो हे मी बघितले. कारण प्रेक्षकांना एखादा नवीन विषय चित्रपटाच्या माध्यमातून बघायला मिळत असेल, तर ते आणखी आवडीने आणि उत्सुकतेने पाहतात. त्यामुळेच या वेगळ्या प्रकारातील चित्रपटाला यश मिळाले.

मी असे काहीच ठरवलेले नाही, की मला याच जॉनरमध्ये काम करायचे आहे किंवा त्याच जॉनरमध्ये काम करायचे आहे. एक नवोदित कलाकार म्हणून मला वैविध्यपूर्ण भूमिका करायला आवडतील. जिथे मला असे वाटेल की मी या भूमिकेसाठी परफेक्ट आहे तिथे मी नक्कीच काम करेन. एखाद्या वेगळ्या भूमिकेसाठी आणखी मेहनत करायला माझी नेहमीच तयारी असेल.