Sakal Premier Award 2024 : मराठी चित्रपट ‘कान’मध्ये घेऊन जाणार : छाया कदम

Sakal Premier Award 2024 : ‘माझी धाव राष्‍ट्रीय पुरस्कारांपर्यंतच होती. हा पुरस्कार मिळवल्याशिवाय मरायचे नाही, अशी इच्छा होती. फार पुढचा विचार केला नव्‍हता. ‘कान’मधील पुरस्काराबाबत तर मुळीच नाही. ‘ऑल वुई इमॅजिन ॲज अ लाईट’च्या निमित्ताने ‘कान’ला गेले आणि स्क्रीनिंगनंतर मी आमच्या टीममधील सर्वांना सांगायचे, ‘यार गट फीलिंग आहे.

ऐसे नहीं जाऊंगी, कुछ तो लेके जाऊंगी.’ ते सत्यात उतरले तेव्‍हा खूप वेगळा अनुभव होता. यानंतर जेव्‍हा मी ‘कान’ जाईन, तेव्‍हा मराठी चित्रपट घेऊन जायचे आहे,’ अशी भावना मराठमोळी अभिनेत्री छाया कदम यांनी व्‍यक्त केली.

यंदा छाया कदम यांच्या ‘ऑल वुई इमॅजिन ॲज अ लाईट’ या चित्रपटाला ‘कान’ या प्रतिष्ठित चित्रपट महोत्सवात मानाचा पुरस्कार मिळाला. त्यांच्या या यशाबद्दल त्यांना ‘सकाळ प्रीमियर अवॉर्ड’ सोहळ्यात गौरवले. त्या वेळी त्यांनी आपल्या आनंदाचे क्षण सर्वांसमोर उभे केले.

त्या म्हणाल्या, ‘‘आपण कान फिल्म फेस्टिवलमध्ये आलो आहोत आणि येथून पुरस्कार घेऊन जात आहोत, हा एक वेगळाच आनंदाचा क्षण होता. मात्र, तेथून परतल्यावर हा आनंद द्विगुणित झाला. इकडे येईपर्यंत येथे काय चाललेय, याची माहिती नव्‍हती.

प्रत्येक जण भेटून मला सांगत होता की, ताई असे वाटत होते की आम्ही ‘कान’ला आहोत. आम्हीच तो पुरस्कार स्वीकारला आहे. आम्ही इथे नाचलो सेलिब्रेट केले, एकमेकांना पार्टी दिली. ही माझ्यासाठी सगळ्यात मोठी अचिव्हमेंट आहे.