Marathi Natak: ही लोकप्रिय मराठी अभिनेत्री रंगभूमीवर पुन्हा करणार एंट्री, नाट्यरसिकांसाठी पर्वणी

Dr shweta pendse Is Back In Threater : गेल्या काही वर्षांपासून अभिनयापासून लांब असलेली लोकप्रिय मराठी अभिनेत्री रंगभूमीवर पुन्हा एंट्री करणार आहे. यामुळे नाट्यरसिकांसाठी ही एक पर्वणी असणार आहे.

आपल्या उत्तम आणि सयंत अभिनयाने डॉ. श्वेता पेंडसे हिने आजवर अनेक भूमिका सशक्तपणे पेलल्या आहेत.यातच आता डॉ. श्वेता पेंडसे यांनी रंगभूमीवर पुन्हा एंट्री घेतली आहे. 'अ परफेक्ट मर्डर’ या नाटकासाठी पेंडसे यांनी खाकी वर्दी चढवली आहे.

रहस्यांचा बादशहा आल्फ्रेड हिचकॉक याच्या एका मर्डर मिस्ट्रीचे मराठीत रूपांतर करत लेखक निरज शिरवईकर आणि दिग्दर्शक विजय केंकरे यांनी ‘अ परफेक्ट मर्डर’ नाटकाचा उत्तम पट रंगमंचावर मांडला आहे. बदामराजा प्रॉडक्शन्स संस्थेच्या या नाटकाचे निर्माते माधुरी गवांदे, निनाद कर्पे आहेत.

घटना-प्रसंगांतून निर्माण केलेले गूढ उकलताना केली जाणारी रहस्य आणि त्याची कल्पक मांडणी हे या नाटकाचं वैशिष्टय असून लवकरच या नाटकात अभिनेत्री डॉ. श्वेता पेंडसे खाकी वर्दीत दिसणार असून तिच्या येण्याने नाटकाला कलाटणी मिळणार आहे. .

गेली अनेक वर्ष नाट्यरसिकांचं मनोरंजन करीत या नाटकाने आपली घोडदौड सुरु ठेवली आहे. खून लपवण्याचा आणि खुनामागचं खरं रहस्य उलगडण्याचा खेळ म्हणजे ‘अ परफेक्ट मर्डर’ हे नाटक. अनेक नावाजलेल्या कलाकारांनी यात भूमिका साकारल्या आहेत. नाटकाला वेगळा ट्विस्ट देण्यासाठी अभिनेत्री डॉ.श्वेता पेंडसे लेडी इन्स्पेक्टर म्हणून समोर येणार आहे. या वेगळ्या भूमिकेद्वारे ती या नाटकात पुनरागमन करते आहे.

‘सस्पेन्स थ्रीलर’ नाटक म्हटलं की कथेसोबत कलाकारांच्या अभिनयाचा कस असतो. माझ्यासाठी ही भूमिका तितकीच चॅलेंजिंग असल्याचे डॉ.श्वेता सांगते.