Kartik Aaryan: उंदरांमुळे कार्तिक आर्यनचं लाखोंचं नुकसान; नेमकं प्रकरण काय?

Kartik Aaryan: बॉलिवूडमधील प्रसिद्ध अभिनेता कार्तिक आर्यन (Kartik Aaryan) हा सध्या त्याच्या 'चंदू चॅम्पियन' (Chandu Champion) या चित्रपटामुळे चर्चेत आहे. हा चित्रपट मुरलीकांत पेटकर यांच्या जीवनावर आधारित आहे. कार्तिकसाठी हा चित्रपट खास आहे. कारण या चित्रपटासाठी कार्तिकनं बरीच मेहनत घेतली आहे. अशातच कार्तिक 'चंदू चॅम्पियन' या चित्रपटाचं प्रमोशन करण्यात व्यस्त आहे. कार्तिकनं नुकतीच एका युट्यूब चॅनलला मुलाखत दिली. या मुलाखतीत कार्तिकनं त्याच्या कारबद्दल सांगितलं.

उंदरांमुळे कार झाली खराब

बॉलिवूडमधील 13 वर्षांच्या करिअरमध्ये कार्तिक आर्यनने अनेक ब्लॉकबस्टर हिट चित्रपट दिले आहेत. 'भूल भुलैया 2' या हिट चित्रपटानंतर टी-सीरीजचे मालक भूषण कुमार यांनी कार्तिकला 4 कोटी 70 लाख रुपयांची एक मॅक्लारेन कार भेट दिली. कार्तिक आर्यनच्या मॅक्लारेन कारचा रंग केशरी आहे. या कारमध्ये कम्फर्ट मोड, स्पोर्ट मोड आणि तिसरा म्हणजे ट्रॅक मोड आहेत. मात्र दुर्दैवाने उंदरांनी ही कार खराब केली.

कार्तिक आर्यनने The Lallantop या युट्यूब चॅनलला दिलेल्या मुलाखतीत सांगितले की, भारतात आलेली ही पहिली मॅक्लारेन कार आहे. ही कार त्यानं काही वेळ चालवली आणि नंतर गॅरेजमध्ये पार्क केली होती. पण उंदरांनी त्याच्या कारच्या मॅट्स कुरतडल्या आणि अनेक गोष्टींचे नुकसान केले. कार्तिकने सांगितले की, "ही कार दुरुस्त करण्यासाठी मला लाखो रुपये खर्च करावे लागले."

चंदू चॅम्पियन या चित्रपटानंतर कार्तिक हा 'भूल भुलैया 3' या चित्रपटातून प्रेक्षकांच्या भेटीला येणार आहे. या चित्रपटाची प्रेक्षक उत्सुकतेने वाट बघत आहेत.