Mumbai News: अक्षय कुमारच्या नावे तरुणीची लाखोंची फसवणूक; जुहूस्थित तरुणाला पोलिसांनी केली अटक

Mumbai Crime News: चंदेरी फिल्मी दुनियेत काम करून मोठा स्टार होण्याचं स्वप्नं अनेकजण पाहतात आणि त्यासाठी अनेकजण मुंबईत येतात.स्वप्ननगरी म्हटलं जाणाऱ्या या शहरात फक्त सिनेइंडस्ट्रीत काम मिळेल या इच्छेपोटी आपलं शहर सोडून आलेले अनेक तरुण लोक आहेत. यातील काहींची स्वप्नं पूर्ण होत तर काहींच्या हाती निराशा येते. यात अनेकांची फसवणूक सुद्धा होते. बऱ्याचदा मोठ्या स्टार्सच्या नावांचा वापर करून लोकांची फसवणूक केली जाते. गेल्या काही वर्षात असे अनेक प्रकार उघड झाले आहेत. नुकतंच अभिनेता अक्षय कुमार (Akshay Kumar) यांच्या नावाचा वापर करून मुंबईत (Mumbai) एका तरुणीची फसवणूक करण्यात आली.

चित्रपटात काम मिळणून देण्याचं आमिष दाखवू तरुणीची लाखोंची फसवणूक

अभिनेता अक्षय कुमार यांची 'केप ऑफ गुड फिल्म्स' ही निर्मिती संस्था आहे. या निर्मितीसंस्थेतून आजवर अनेक सिनेमांची निर्मिती करण्यात आली आहे. या संस्थेच्या माध्यमातून सिनेमात रोल मिळवून देतो असं आमिष दाखवून मुंबईत एका तरुणीची फसवणूक करण्यात आली. ही तरुणी २८ वर्षांची असून सिनेमात रोल मिळावा म्हणून प्रयत्न करत होती. त्यावेळी रोहन मेहरा उर्फ राजन अंजनीकुमार सिन्हा या २९ वर्षीय तरुणाने तिला भूमिकेचं आमिष दाखवून तिच्याकडून पोर्टफोलिओ बनवण्यासाठी सहा लाख रुपये उकळले.

आपली फसवणूक झाल्याचं उघड होताच त्या तरुणीने पोलीस स्टेशनमध्ये धाव घेत सदर तरुणाविरुद्ध तक्रार दाखल केली. 419,420 भादंवि नुसार गुन्हा दाखल करून पोलिसांनी आरोपीला अटक केली आहे. आरोपी तरुण सध्या जुहू पोलिसांच्या ताब्यात आहे तसंच पोलीस त्याने अशी अजून कोणाची फसवणूक केली आहे का याबाबत तपास करत आहेत.

दरम्यान संबंधित निर्मिती संस्था किंवा अभिनेता अक्षय कुमार यांच्या कडून सदर प्रकरणाबाबत काहीही प्रतिक्रिया आलेली नाहीये. पोलीस या प्रकरणाची सध्या सखोल चौकशी करण्याचा प्रयत्न करत आहेत.

या आधीही घडला आहे असा गुन्हा

या आधीही राजधानी दिल्लीमध्ये वेबसिरीज, सिनेमा आणि सिरीयलमध्ये रोल मिळवून देतो असं आमिष दाखवून अनुज कुमार ओझा नावाच्या व्यक्तीने अनेक तरुणांना फसवल्याचं उघडकीस आलं होतं. संबंधित व्यक्तीने एका तरुणाकडून वेबसिरीजमध्ये काम मिळवून देण्याचं आश्वासन देऊन चार लाख रुपयांची फसवणूक केल्याचं उघड आलं होतं.