Noor Malabika: अभिनेत्रीच्या मृत्यूप्रकरणी कलाकारांच्या संघटनेने मुख्यमंत्र्यांना लिहिलं पत्र; केली चौकशीची मागणी

Noor Malabika: अभिनेत्री नूर मलाबिकादासचा (Noor Malabika) काही दिवसांपूर्वी मृत्यू झाला आहे. तिच्या मृत्यूची बातमी समोर येताच अनेकांना धक्का बसला. पोलिसांनी नूर मलाबिका दासचा मृतदेह तिच्या लोखंडवालामधील फ्लॅटमधून 6 जून रोजी ताब्यात घेतला. रिपोर्टनुसार, पोलिसांनी नूरचा सडलेला मृतदेह ताब्यात घेतला. आता नूरच्या मृत्यू प्रकरणाबाबत ऑल इंडियन सिने वर्कर्स असोसिएशननं मुख्यमंत्री एकनाथ शिंदे (Eknath Shinde) यांना पत्र लिहिलं आहे.

ऑल इंडियन सिने वर्कर्स असोसिएशननं मुख्यमंत्र्यांना लिहिलं पत्र

ऑल इंडियन सिने वर्कर्स असोसिएशन महाराष्ट्राचे मुख्यमंत्री एकनाथ शिंदे आणि गृहमंत्री देवेंद्र फडणवीस यांना अभिनेत्री नूर मालाबिका दासच्या मृत्यू प्रकरणाची चौकशी करण्याची मागणी केली आहे.

ऑल इंडियन सिने वर्कर्स असोसिएशननं याबाबत ट्वीट देखील केलं आहे. या ट्वीटमध्ये त्यांनी लिहिलं, "ऑल इंडियन सिने वर्कर्स असोसिएशन महाराष्ट्राचे मुख्यमंत्री माननीय श्री एकनाथ शिंदे आणि गृहमंत्री माननीय श्री देवेंद्र फडणवीस यांना अभिनेत्री नूर मलाबिका दासच्या आत्महत्या प्रकरणाची सखोल चौकशी करण्याची मागणी करत आहे."

ऑल इंडियन सिने वर्कर्स असोसिएशननं त्यांनी मुख्यमंत्र्यांना लिहिलेल्या पत्राचा फोटो देखील ट्विटरवर शेअर केला आहे. या पत्रामध्ये लिहिलेलं दिसत आहे, “नूरचा अकाली मृत्यू हा भारतीय चित्रपटसृष्टीतील आत्महत्यांच्या दुःखद ट्रेंडची आठवण करून देणारा आहे. बॉलिवूडमध्ये अशा प्रकारच्या दुःखद घटना वारंवार घडत आहेत, त्यामुळे यामागच्या मूळ कारणांचा सखोल तपास करणं गरजेचं आहे.”

नूर मलाबिकाच्या फ्लॅटमधून दुर्गंधी येत असल्याची तक्रार तिच्या शेजाऱ्यांनी पोलिसांकडे केली. त्यानंतर ओशिवरा पोलिसांनी नूरचा सडलेला मृतदेह ताब्यात घेतला.