Pravin Tarde: नरेंद्र मोदी यांनी रविवारी (9 जून) तिसऱ्यांदा पंतप्रधानपदाची शपथ घेतली. नरेंद्र मोदींसोबतच इतर काही मत्र्यांनी देखील शपथ घेतली. मोदींच्या मंत्रिमंडळात पुण्याचे खासदार मुरलीधर मोहोळ यांचाही समावेश आहे. मुरलीधर मोहोळ यांच्यावर सध्या शुभेच्छांचा वर्षाव होत आहे. अशातच आता मुरलीधर मोहोळ हे मंत्रिमंडळात सहभागी झाल्यानंतर अभिनेते प्रवीण तरडे (pravin tarde) यांनी एक खास पोस्ट सोशल मीडियावर शेअर केली आहे.
प्रवीण तरडे यांनी मुरलीधर मोहोळ यांचा फोटो सोशल मीडियावर शेअर करुन कॅप्शनमध्ये लिहिलं, "मित्रा, आज शब्दं अपुरे पडतील पण लेखन थांबायचं नाही .. कित्येकजण योगायोगानं राजकारणात येतात पण तू काहीतरी ठरवून यामधे आलास.. राजकारणात येवून लोक समाजकारण लोणच्या सारखं वापरतात पण तू ते ताट भरून घेतलंस, पोटभरून रिचवलंस.. कदाचित म्हणुनच कोरोनाच्या महामारीत तू पुण्याला वाचवलंस."
"तुझ्या त्या पुण्याईनं तुझ्यासाठी लोकसभेची दारं उघडली अन् पुणेकरांनी पण त्याची सव्याज परतफेड केली.. तुला लाखोच्या मताधिक्यानं दिल्ली दाखवली.. दिल्लीनं तर दिलादारपणाचा कळस गाठला आणि थेट मंत्रीपदाची माळ तुझ्या गळ्यात घातली. पण मित्रा एवढं सगळं होउनही असं वाटतय ही तर फक्तं सुरवात आहे अजुनही परम वैभवम नेतुमेतत स्वराष्ट्रम या दैवी संदेशा पासून आपण थोडं दूरच आहोत.. येत्या पंचवीस वर्षात जितकं जमेल तितकं या दैवी संदेशाच्या जवळ जाण्याचा प्रयत्न करू.पुण्येश्वराची पुण्याई तुझ्या पाठीशी आहेच बाकी मुळशीची शान , पुण्याचा अभिमान , भारत देशाचा स्वाभिमान ठरो,तुझं खुप अभिनंदन आणि आभाळभर शुभेच्छा.", असंही प्रवीण यांनी कॅप्शनमध्ये लिहिलं.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
