Ramesh Pardeshi: मॉलच्या बाथरुममध्ये तरुणींचे ड्रग्स सेवन; पिट्या भाई व्हिडीओ शेअर करत म्हणाला,"पुढची पिढी बरबाद होऊ नये म्हणून..."

Ramesh Pardeshi: गेल्या काही दिवसांपासून पुण्यातील (Pune) ड्रग्स प्रकरणांमध्ये वाढ झालेली पहायला मिळत आहे. ही चिंतेची बाब आहे. अशातच आता मुळशी पॅटर्न फेम अभिनेते रमेश परदेशी यांनी नुकताच एक व्हिडीओ सोशल मीडियावर शेअर केला आहे. या व्हिडीओमध्ये दोन तरुणी एका मॉलच्या बाथरूममध्ये ड्रग्सचं सेवन करताना दिसत आहेत. रमेश परदेशी यांनी हा व्हिडीओ शेअर करुन कॅप्शनमध्ये या प्रकरणावर संताप व्यक्त केला आहे.

रमेश परदेशी यांची पोस्ट

मुळशी पॅटर्न या चित्रपटात पिट्या भाई ही भूमिका साकारणारे अभिनेते रमेश परदेशी यांनी सोशल मीडियावर पोस्ट शेअर करुन पुण्यातील ड्रग्स प्रकरणावर संताप व्यक्त केला आहे. या पोस्टमध्ये त्यांनी लिहिलं, "आधी ललित पाटील,आज फर्ग्युसन रस्त्यावर ड्रग्स पार्टी आणि त्याच दिवशी एका मॉलच्या बाथरूम मध्ये ह्या तरुणींचे ड्रग्स सेवन. हेच अश्या प्रकारच वास्तव मी काही महिन्यापूर्वी दाखवलं (अपवाद चेहरे ब्लर करायचा) त्यांनी तर जे काही व्यसन केल ते तर पब्लिक जागेत ते पण सर्वासमोर आणि ते करताना त्यांना काही फरक पडला नाही. आणि आता ह्या बाथरूम मध्ये हे करतायत बिनधास्त. आणि त्यांच सार्वजनिक आयुष्य कस धोक्यात आणले ही तक्रार करून माझे माझ्या कुटुंबाच मानसिक स्वास्थ्य घालावल असो.

"आपले आपल्या शहराकडे आपल्या आणि आजुबाजूला असणार्‍या मुलांमुलीकडे लक्ष आहे का? आपण लक्ष देणार आहोत का? की फक्त प्रशासन आणि पोलीस यंत्रणा यावर अवलंबून न राहता एक पालक नागरिक म्हणून पुढची पिढी बरबाद होऊ नये म्हणून काही करणार आहोत का? आणि करणार असाल तर डोळे,कान उघडे करून फिरा. आणि सगळे जण मिळून छत्रपती शिवाजी महाराज यांनी सोन्याच्या नांगरान नांगरलेल्या पावित्र पुण्यभूमीला जपू... मी पुणेकर माझं शहर माझा अभिमान... माझी जबाबदारी... (कृपया राजकीय कमेंट नको)", असंही रमेश परदेशी यांनी पोस्टमध्ये लिहिलं.