Randeep Hooda: आलियाला टार्गेट केल्यामुळे रणदीपनं कंगनाला फटकारलं; म्हणाला, "हे अशोभनीय"

Randeep Hooda: अभिनेता रणदीप हुड्डा (Randeep Hooda) हा सध्या स्वातंत्र्य वीर सावरकर (Swatantrya Veer Savarkar) या चित्रपटांमुळे चर्चेत आहे. रणदीप गेल्या काही दिवसांपासून या चित्रपटाचं प्रमोशन करत आहे. रणदीप हा त्याच्या चित्रपटांमुळे नेहमीच चर्चेत असतो. विविध कलाकारांसोबत रणदीपनं काम केलं आहे. हायवे या चित्रपटातील रणदीप आणि आलिया भट्ट (Alia Bhatt) यांच्या केमिस्ट्रीला प्रेक्षकांची विशेष पसंती मिळाली. नुकत्याच एका मुलाखतीत रणदीपनं आलियाचं कौतुक करत तिला टार्गेट करणाऱ्यांना सडेतोड उत्तर दिलं आहे.

काय म्हणाला रणदीप?

कंगना रनौत ही आलियाला टार्गेट करते याबद्दल तुला काय वाटतं? असा प्रश्न सिद्धार्थ कन्नननं रणदीपला विचारला. याबद्दल रणदीप म्हणाला, "हायवे चित्रपटाचं शूटिंग सुरु असताना आलियासोबत मी कनेक्ट झालो. ती माझ्यासोबत कनेक्ट झाली की नाही ते मला माहित नाही. मी आता फक्त माझ्याबद्दल सांगू शकतो. तिने नेहमी नवनवीन गोष्टी करण्याचा प्रयत्न केल्याचे मी पाहिले आहे. मी तिच्या पाठीशी खऱ्या अर्थाने उभा राहिलो कारण तिला अयोग्यरित्या टार्गेट केलं जात होतं”

"ज्या गोष्टी तुम्हाला मिळाल्या नाहीत असे वाटते तुम्हाला वाटते, त्यासाठी सहकाऱ्याला टार्गेट करणे चुकीचे आहे. मला वाटते की तुम्हाला या इंडस्ट्रीतून बरेच काही मिळाले आहे, तरीही तुम्ही सहकाऱ्याला टार्गेट करत असाल तर हे अशोभनीय आहे.", असंही रणदीप मुलाखतीत म्हणाला.

कंगनानं आलियावर केली टीका

2019 मध्ये कंगनाने गली बॉय या चित्रपटातील आलियाच्या अभिनयाची खिल्ली उडवली होती. ती म्हणाली होती, "गली बॉयमध्ये आलियाच्या अभिनयात विशेष काय होते? मीडियाने फिल्मी मुलांना भरभरून प्रेम दिले आहे. त्यांचे कौतुक करणे थांबवा"

रणदीपनं शेअर केलं होतं ट्वीट

रणदीपनं आलियाच्या कामाचं कौतुक करत एक ट्वीट शेअर केलं होतं. या ट्वीटमध्ये त्यानं लिहिलं, "प्रिय आलिया, मला खूप आनंद झाला आहे की, तू  occasional कलाकारांच्या मतांचा स्वत:च्या कामावर परिणाम होऊ दिला नाही.." आलियानं रणदीपच्या या ट्वीटला 'Randy' असा रिप्लाय दिला.