तिला खूप अ‍ॅटीट्युड... स्टायलिस्टसोबत वाईट वागायची राणी मुखर्जी; म्हणाली- ऐश्वर्यासोबतही काम केलं पण

बॉलिवूड कलाकार हे कायमच कॅमेरासमोर मेकअप करून येतात. छान तयार होऊन येतात. मात्र ते ज्यांच्यामुळे छान दिसतात ते मेकअप आर्टिस्ट आणि हेअर स्टायलिस्ट कायम दुर्लक्षितच राहतात. अशाच एका अनुभवी हेअर स्टायलिस्टने आता एक मुलाखत दिली आणि या मुलाखतीत तिने अनेक अभिनेत्रींच्या वागणुकीबद्दल सांगितलं आहे. कुणी आपल्याला कशी वागणूक दिली याबद्दल तिने बिनधास्त भाष्य केलं आहे. हेअर स्टायलिस्ट मारिया यांनी नुकतीच बॉलिवूड नाऊला मुलाखत दिली. या मुलाखतीत त्यांनी राणी मुखर्जीने दिलेल्या वाईट वागणुकीबद्दल भाष्य केलं.

मारिया म्हणाल्या, 'मी अभिनेत्री ऐश्वर्या राय हिच्यासोबत काम केलं आहे. ती खूप चांगली आहे. मी 'सिलसिला ये चाहत का' या गाण्यात तिचे केस सेट केले होते. पुढे एकदा जेव्हा मी कंगना रणौत सोबत ग्रीसला गेले होते. तिथे ऐश्वर्या आणि अभिषेक होते. ते पायऱ्या उतरत होते आणि मी चढत होते. मला वाटलं ती मला ओळखणार नाही पण तिने मला ओळखलं आणि स्वतःहून हाक मारली. मला विचारलं तू इथे कशी, मग मी सांगितलं की कंगनाची हेअर स्टायलिस्ट म्हणून आली आहे.'

कशी वागायची राणी?

पुढे मारिया म्हणाल्या, 'मी सुष्मिता सेनसोबतही काम केलंय. सुष्मिता मला नेहमी बोलवायची. तिला माझं काम पसंत होतं. पण माझा राणीबरोबरचा अनुभव खूप वाईट होता. माझं आणि तिचं एकदा खूप मोठं भांडण झालं होतं. ती नेहमी तिच्या केसांवरून गोंधळ घालायची आणि हेअर स्टायलिस्टला केस बदलायला सांगायची. ती मला हॉटेलवर बोलवायची आणि नंतर तिच्यासोबत घेऊन नाही जायची. शूटवर तिचे केस स्टाइल करायला सांगायची. मला नाही माहीत तिचा काय स्वभाव होता पण मी खूप मोठ्या कलाकारांसोबत काम केलं होतं. तरीही ती मला खूप वाईट वागणूक द्यायची.'

त्या पुढे म्हणाल्या, 'मी हेमा मालिनी, शर्मिला टागोर यांच्यासोबत काम केली. पण ती माझ्याशी अशा पद्धतीने बोलायची, मला खूप वाईट वाटायचं. मी तिला शाप दिला. म्हणूनच की काय तिचे सगळे चित्रपट फ्लॉप झाले.'