Sakal Premier Awards 2024 : हा पुरस्कार पवित्र अन्‌ मंगलमय : वर्षा उसगावकर

Sakal Premier Awards 2024 :: माझ्या प्रसिद्ध आणि दुर्लक्षित कामांची दखल घेत मला ‘सकाळ समूहा’ने दिलेला ‘सकाळ प्रीमियर अवॉर्ड’ हा माझ्यासाठी अत्यंत पवित्र आणि मंगल आहे. यामुळे माझी पुढची वाटचाल आणखी दमदार होईल. हा आदर्श पुरस्कार आहे, अशा शब्दांत पुरस्कार विजेत्या वर्षा उसगावकर यांनी भावना व्‍यक्त केली.

सिनेसृष्टीतील विशेष योगदानाबद्दल पुरस्कार सोहळ्यात वर्षा उसगावकर यांचा विशेष सन्मान करण्यात आला. त्यावेळी त्यांनी आपल्या भावना व्यक्त करून ‘सकाळ’ला धन्यवाद दिले. वर्षा उसगावकर पुढे म्हणाल्या, ‘‘या पुरस्काराबद्दल मी कृतज्ञ आहे. ‘मागे उभा मंगेश, पुढे उभा मंगेश’ अशीच भावना यावेळी माझ्या मनात येत आहे.

आपल्या अनेक कामांपैकी काहींची स्तुती होते, तर काही दुर्लक्षित राहतात. काही नाटके-चित्रपट चालतात तर काही चालत नाहीत. दुर्लक्षित कामाची कोणी दखल घेतली नाही, असे आपल्याला वाटते; पण कोणीतरी ती कामेही बघत असते. म्हणूनच ‘सकाळ’ने मला दिलेला हा पुरस्कार माझ्यासाठी विशेष आहे. या पुरस्कारामुळे माझा हुरूप वाढला आहे. मी ‘सकाळ’ची ऋणी आहे.’’

आपल्या कारकिर्दीला सहाय्यभूत ठरणारे सचिन पिळगावकर, सतीश कुलकर्णी यांसारखे निर्माते-दिग्दर्शक, वसंत सबनीस, संगीतकार अनिल मोहिले, दामू केंकरे, तसेच सेकंड इनिंगमध्ये आपल्याला नाटके, सिरीयलमध्ये भूमिका देणारे प्रशांत दामले, महेश कोठारे यांचाही उल्लेख केला.