Salman Khan Home Firing: सलमानच्या घरावरील गोळीबारासाठी वापरलेली बाईक कोणाची? रचलेला कट पूर्वनियोजित; तपासातून बरेच खुलासे

अभिनेता सलमान खान याच्या वांद्रे येथील घराबाहेर काल (रविवारी) पहाटे दोन अज्ञातांनी गोळीबार केला. त्यानंतर हे दोन्ही आरोपी फरार झाले होते. या गोळीबार प्रकरणी मुंबई पोलिसांच्या तपासात मोठी माहिती समोर आली आहे. हल्लेखोर आरोपींनी सलमान खानच्या घराजवळ गोळीबार करण्यासाठी वापरलेल्या बाईकबद्दल महत्त्वाची माहिती समोर आली आहे. हल्लेखोरांनी गोळीबार करण्यासाठी वापरलेली बाईक ही रायगडमधील असल्याची माहिती आहे.

सलमान खानच्या घरावर झालेला गोळीबार हा पुर्वनियोजित कट असल्याचं समोर आलं आहे. सुरुवातीला असं दाखवण्यात आलं की गोळीबारात वापरलेली बाईक चोरीची आहे. मात्र पोलिसांनी केलेल्या तपासात ही बाईक विकत घेतल्याचं स्पष्ट झालं आहे. रायगडच्या पेण वरून सेकंड हॅन्ड बाईक हल्लेखोरांनी विकत घेतली होती.

सध्या पोलिसांकडून या बाईकच्या मूळ मालकाची चौकशी करत आहेत. काल(रविवारी) रात्री हल्लेखोऱ्यांचे काही फोटोही सोशल मीडियावर व्हायरल झालेले होते. काल माउंट मेरी चर्च जवळून ती बाईक पोलिसांकडून जप्त करण्यात आली होती. सध्या पोलिस या प्रकरणाची कसून चौकशी करीत आहे.

दरम्यान पोलिसांनी या गोळीबाराचा सर्व बाजूंनी तपास सुरू केला आहे. तर गोळीबार करणाऱ्या आरोपींनी वारंवारं गाडी बदलल्याचं देखील समोर आलं आहे.

कोण आहे सलमानच्या घरावर गोळीबार करणारा विशाल उर्फ कालू?

सीसीटीव्ही फुटेजमध्ये अभिनेता सलमान खानच्या मुंबईतील घराबाहेर गोळीबार करणाऱ्या दोघांपैकी एकाची ओळख पटली आहे. तो गुरुग्रामचा रहिवासी असून, विशाल राहुल उर्फ ​​कालू असे त्याचे नाव आहे. सलमान खानच्या घराबाहेर गोळीबार करणारा विशाल राहुल उर्फ ​​कालू हा गुरुग्रामचा रहिवासी आहे. त्याचे दहावीपर्यंत शिक्षण झाले आहे. त्याच्यावर गोळीबार आणि दुचाकी चोरीचे ५ हून अधिक गुन्हे दाखल आहेत. काही दिवसांपूर्वी लॉरेन्स बिश्नोईच्या सांगण्यावरून विशालने हरियाणातील रोहतकमध्ये एका बुकीची हत्या केली होती.

सीसीटीव्हीमध्ये कैद झालेल्या घटनेत तो गोळीबार करताना दिसत आहे. विशाल हा राजस्थानचा कुख्यात गुंड रोहित गोदाराचा शूटर आहे. रोहित गोदरा हा लॉरेन्स बिश्नोई टोळीशी संबंधित आहे. सलमान खानच्या घराबाहेर झालेल्या गोळीबाराची तार हरियाणाशी जुळत असल्याने हरियाणा पोलिसही या प्रकरणात सक्रिय झाले आहेत. दरम्यान कालूचे नाव अनेक गुन्ह्यांमध्ये आल्याने तो गेल्या फेब्रुवारीपासून बेपत्ता आहे.