Sharad Ponkshe: शरद पोंक्षेंनी का पाहिला नाही 'स्वातंत्र्यवीर सावरकर' चित्रपट? स्वत:च सांगितलं कारण

Swatantra Veer Savarkar: बॉलिवूडमधील प्रसिद्ध अभिनेता रणदीप हुड्डाचा (Randeep Hooda) 'स्वातंत्र्यवीर सावरकर' (Swatantra Veer Savarkar) हा चित्रपट रिलीज होऊन दोन दिवस झाले आहेत. या दोन दिवसात अनेकांनी या चित्रपटाचं कौतुक केलं आहे. अशातच आता अभिनेते शरद पोंक्षे (Sharad Ponkshe) यांनी या चित्रपटाबद्दल एक पोस्ट शेअर केली आहे. या पोस्टमध्ये शरद पोंक्षे यांनी सांगितलं आहे की, त्यांनी अजून हा चित्रपट पाहिलेला नाही. शरद पोंक्षे यांच्या पोस्टनं अनेकांचे लक्ष वेधले आहे.

शरद पोंक्षे यांची पोस्ट

शरद पोंक्षे यांनी फेसबुकवर शेअर केलेल्या पोस्टमध्ये 'स्वातंत्र्यवीर सावरकर' हा चित्रपट न पाहिल्याचं कारण सांगितलं आहे. त्यांनी पोस्टमध्ये लिहिलं, "प्रत्येकाने पहायला हवा. मी दुसऱ्या सिनेमात व्यस्त आहे. म्हणून मला अजून बघणं जमलं नाही. पुढील दोन दिवसात मी बघून एक छान व्हिडीओ करून प्रसारित करणार आहे. हे सांगण्याचं कारण खूप लोक मला विचारताहेत की, तुम्ही चित्रपटाबद्दल काही का बोलला नाहीत तर सिनेमा अधिक बघावा आणि मग सविस्तर त्यावर बोलावं असं ठरवलेलं आहे. पुढील चार दिवसात माझा व्हिडीओ येईलच."

विनायक दामोदर सावरकर यांनी भारताच्या स्वातंत्र्यासाठी दिलेला लढा 'स्वातंत्र्यवीर सावरकर' या चित्रपटात दाखवण्यात आला आहे. या चित्रपटात रणदीपसोबतच अंकिता लोखंडे आणि अमित सियाल यांनी देखील प्रमुख भूमिका साकारली आहे.

'स्वातंत्र्यवीर सावरकर' या चित्रपटाची निर्मिती झी स्टुडिओज, आनंद पंडित, संदीप सिंग, रणदीप हुड्डा आणि योगेश राहर यांनी केली आहे तसेच रूपा पंडित, सॅम खान, अन्वर अली आणि पांचाली चक्रवर्ती यांनी या चित्रपटाची सह-निर्मिती केली आहे.

चित्रपटासाठी रणदीपनं विकलं घर

रणदीपनं एबीपी माझाच्या 'माझा कट्टा' या कार्यक्रमात सांगितलं, "हा सिनेमा तयार करण्यासाठी मला कोणीही मदत केलेली नाही. या सिनेमासाठी मी माझं घर विकलं आहे. मी हा सिनेमा सावरकरांवर झालेला अन्याय दाखवण्यासाठी बनवला आहे. "