काही लोकांना मी आवडत नाही तरी... लोकप्रियतेच्या शिखरावर असताना जुई गडकरीची गूढ पोस्ट; नेमकं झालंय काय?

Tharla Tar Mag: 'ठरलं तर मग' या मालिकेतून प्रेक्षकांच्या मनावर अधिराज्य करणारी लोकप्रिय अभिनेत्री जुई गडकरी हिने आपल्या अभिनयाच्या जोरावर प्रेक्षकांना आपलंसं केलं. ती 'पुढचं पाऊल' या मालिकेतून घराघरात पोहोचली. आता ती सायली बनून प्रेक्षकांची मनं जिंकते आहे. ही मालिका गेली वर्षभर टीआरपी यादीत पहिल्या स्थानावर आहे. या मालिकेतील सायली आणि अर्जुनची जोडी प्रेक्षकांची लाडकी आहे. मात्र आता जुईने सगळ्यांचं लक्ष वेधून घेतलं आहे. तिने केलेली एक पोस्ट चाहत्यांमध्ये चर्चेत आहे. तिने केलेल्या पोस्टमुळे चाहते बुचकळ्यात पडले आहेत.

जुई सोशल मीडियावर कायम सक्रीय असते. ती नेहमीच चाहत्यांसोबत जोडलेली असते. मात्र अशातच तिने शेअर केलेली स्टोरी चाहत्यांच्या चर्चेचा विषय ठरली आहे. जुईने स्टोरी शेअर करत लिहिलं, 'मी माझ्या आयुष्याच्या अशा टप्प्यावर येऊन पोहोचले आहे की, काही लोकांना मी आवडत नाही तरीही याबद्दल मी ठीक आहे. लोकांना त्यांच्या कथेतील माझा भाग सजून घेता येत नाहीये, याबद्दलही मी ठीक आहे. मी कोणालाही स्पष्टीकरण देण्यास बांधिल नाही. मी इथे माझे आयुष्य जगण्यासाठी आहे.'

जुईने पुढे लिहिलं, 'लोक काय म्हणतीलच्या बेड्यांनी मला स्वत:ला जखडून घ्यायचे नाही, हेच मी निवडले आहे. मी शांती निवडली आहे. मी माझे सत्य निवडले आहे. मी स्वत:ला निवडले आहे'. जुईने ही स्टोरी नेमकी कुणासाठी शेअर केली आहे हे मात्र तिने सांगितलं नाहीये. यासोबतच तिने ईमोजी पोस्ट करत ओके धन्यवाद असंही लिहिलं आहे. जुईने या पोस्टमधून एका प्रकारे समोरच्याला उत्तरच दिलं आहे असं म्हटलं तरी वावगं ठरणार नाही. जुईने गेल्या २ वर्षात एका मोठ्या आजाराचा सामना केला आहे. त्यानंतर तिने पुन्हा गगनभरारी घेत पुन्हा एकदा स्वतःची वेगळी ओळख निर्माण केली.