चोरीला गेलेला मोबाईल परत मिळेल, पण...

अन्न, वस्त्र व निवारा यासह आता मोबाईलही प्रत्येकाची मुख्य गरज बनली आहे. सध्या प्रत्येकाकडे मोबाईल आहे. मोबाईलशिवाय जगणेच अशक्य अशी स्थिती आहे. संपर्क साधण्यासह इंटरनेटचे कामही त्यावर होत असल्याने तो जणू कॉम्पुटरच बनला आहे. मात्र, तो हाताळताना हवी तितकी काळजी घेतली जात नसल्याचे दिसून येते. त्यामुळे मोबाईल चोरीचे व गहाळ होण्याचे प्रमाण वाढत आहे. काही क्षण मोबाईल जवळ नसल्यास काय स्थिती होते. हे त्यावेळी कळते. केवळ किमती वस्तू चोरीला जाते एवढेच नाही तर त्यातील महत्त्वाचे संपर्क क्रमांकही आपल्याकडून जातात. असे झाल्यास मोठ्या अडचणींचा सामना करावा लागतो. मोठ्या मेहनतीने मिळविलेले संपर्क क्रमांक अनेक वर्षांपासून जतन केलेले असतात. मात्र, मोबाईलची चोरी झाल्यास त्यासह क्रमांक जाणे नुकसानीचे ठरते.