हिवाळ्यात प्या तुळस गवती आणि आरोग्यवर्धक चहा..!

निर्मला देशपांडे

तुळस गवती चहा काढा

साहित्य

दहा-बारा तुळशीची पाने, २ पाने चिरलेली गवती चहाची पाने, अर्धा चमचा आल्याचा कीस, चमचाभर धन्याची जाडसर पूड, छोटा दालचिनी तुकडा, चिमूटभर मिरपूड, प्राजक्ताची २ पाने, १ बेलपान, खडीसाखर.

कृती

पातेल्यात दोन कप पाणी उकळत ठेवावे. त्यात वरील सर्व साहित्य घालावे. उकळून एक कप काढा करावा. गाळून गरम गरमच प्यावा.

आरोग्यवर्धक चहा

साहित्य

प्रत्येकी १०० ग्रॅम धने व गवती चहा, प्रत्येकी ३ ग्रॅम लेंडी पिंपळी व सुंठ, प्रत्येकी ५ ग्रॅम तुळस, पुदिना, वेलची व गुलाब पाकळ्या, प्रत्येकी २ ग्रॅम जेष्ठमध, दालचिनी व अर्जुन पूड, चवीपुरती पत्री खडीसाखर किंवा गूळ.

कृती

वाळलेला गवती चहा कापून त्याची मिक्सरवर पूड करावी. धने, दालचिनी व वेलचीची पूड करावी. वाळलेली देशी गुलाबकळी अर्धवट कुटावी. तुळस, पुदिना वाळवून जाडसर पूड करावी. मग सगळे एकत्र करून डब्यात भरून ठेवावे.

चहा करण्यासाठी एक कप पाण्यात तयार पूड १ चमचा आणि चवीपुरती खडीसाखर किंवा गूळ घालून उकळून पाऊण कप करावे. गाळून गरम गरम प्यावा.