Pune Rain Update : पाऊस पडला, पण पाणी साठेना; पुण्यासाठी १२.२६ टक्के साठा शिल्लक

Pune News : शहरात जूनच्या पहिल्या आठवड्यात पाऊस पडून आणि गेल्या दोन दिवसांपासून पुन्हा पाऊस पडण्यास सुरुवात होऊनही, शहराला पाणीपुरवठा करणाऱ्या खडकवासला प्रकल्पातील चार धरणांमध्ये अद्याप पाणी जमा होण्यास सुरुवात झालेली नाही. याउलट पाणीसाठा कमी झाला आहे.

यामुळे धरणांची अवस्था ही ‘पाऊस पडला, पण पाणी साठेना’ अशी झाली आहे. शहराला पाणीपुरवठा करणाऱ्या खडकवासला प्रकल्पातील चार धरणांमध्ये मिळून सध्या फक्त ३.५८ टीएमसी पाणी शिल्लक राहिले आहे.

या प्रकल्पांतील पाणीसाठ्याचे प्रमाण अवघे १२.२६ टक्के इतके आहे. गतवर्षीच्या तुलनेत पाणीसाठा ०.८२ टीएमसी इतका कमी आहे. खडकवासला प्रकल्पांत गेल्या वर्षीच्या आजच्या तारखेला ४.४० टीएमसी पाणीसाठा शिल्लक होता.

गतवर्षीच्या उपलब्ध पाणीसाठ्याचे प्रमाण १५.१० टक्के इतके होते. उपलब्ध पाणीसाठ्याची गतवर्षीची आजच्या तारखेची आणि या वर्षीच्या आजच्या तारखेच्या टक्केवारीची तुलना केल्यास, गतवर्षीच्या तुलनेत यंदा २.८४ टक्के इतका पाणीसाठा कमी झाला आहे.

पुण्याला पाणीपुरवठा करणाऱ्या खडकवासला प्रकल्पात टेमघर, वरसगाव, पानशेत आणि खडकवासला अशी चार धरणे येतात. या धरणांमधील मिळून एकूण उपयुक्त पाणीसाठा २९.१५ टीएमसी इतका आहे. यापैकी सध्या केवळ ३.५८ टीएमसी पाणी शिल्लक राहिले आहे.

दरम्यान, जिल्ह्यातील २६ धरणांव्यतिरिक्त टाटा समूहाच्या सहा धरणांमधील पाणीसाठा वेगळा आहे. जिल्ह्यात एकूण ३२ धरणे आहेत. यापैकी सहा धरणे टाटा समूहाची आहेत, ती वगळता उर्वरित २६ धरणे आहेत.

जिल्ह्यातील धरणांमध्ये उजनी, भामा आसखेड, माणिकडोह, चासकमान, पवना, मुळशी, टेमघर, वरसगाव, पानशेत, गुंजवणी, नीरा देवधर, भाटघर, वीर आदी प्रमुख धरणांचा समावेश आहे. प्रमुख धरणांसह सर्व मिळून एकूण उपयुक्त पाणीसाठा क्षमता १९८.३४ टीएमसी इतकी आहे.

‘खडकवासला’तील उपलब्ध

पाणीसाठा - (टीएमसीमध्ये)

• टेमघर- ०.०३

• वरसगाव -१.१५

• पानशेत -१.३६

• खडकवासला- १.०३