विहीरीत पोहण्यासाठी गेलेल्या १७ वर्षीय मुलाचा बुडून मृत्यू

उरुळी कांचन - विहीरीत पोहण्यासाठी गेलेल्या एका सतरा वर्षीय मुलाचा बुडून मृत्यू झाला असल्याची घटना कोरेगाव मूळ (ता. हवेली) ग्रामपंचायत हद्दीतील कोलते वस्ती येथे घडली आहे.

दयानंद प्रकाश रणदिवे (वय-१७ रा. कळंब, जिल्हा उस्मानाबाद) असे बुडून मृत्यू झालेल्या मुलाचे नाव आहे. मिळालेल्या माहितीनुसार, दयानंद रणदिवे हा कोरेगाव मूळ या ठिकाणी राहणाऱ्या त्याच्या नातेवाईकांकडे आला होता. नातेवाईकांनी त्यांची दोन मुले व दयानंद यांना गुरे राखण्यासाठी पाठवले होते. गुरे राखायला गेल्यानंतर तिघेजण कोरेगाव मूळ येथील कोलते वस्ती येथील एका विहीरीवर दुपारी दोन वाजण्याच्या सुमारास पोहण्यासाठी गेले होते. मात्र दयानंद ला पोहता येत नसताना हि तो विहरीत उतरला. तसेच त्याला पाण्याचा अंदाज न आल्याने व विहरीत असलेल्या गाळामुळे त्याला विहीरीतून निघता न आल्याने मृत्यू झाल्याचे त्याठिकाणी असलेले नागरिक सांगत होते.

दरम्यान, दयानंद याचा मृतदेह काढण्यासाठी फायर ब्रिगेड, पोलीस प्रशासन व ग्रामस्थांच्या मदतीने मृतदेह सायंकाळी साडे पाच वाजण्याच्या सुमारास बाहेर काढण्यात आला.

यावेळी लोणी काळभोर पोलीस ठाण्याचे गुन्हे शाखेचे पोलीस निरीक्षक सुभाष काळे, पोलीस उपनिरीक्षक नितीन शिंदे, सदशिव गायकवाड, पोलीस शिपाई किशोर कुलकर्णी, भगत, कोरेगाव मूळच्या पोलीस पाटील वर्षा कड, स्थानिक नागरिक आपासाहेब कड आदि ग्रामस्थ घटनास्थळी दाखल झाले होते.