Mumbai Attack : मुंबईवरील 26/11 च्या हल्ल्यातील पोलिस, जवानांचा लढा पाठ्यपुस्तकात समाविष्ट करावा

पुणे - मुंबईवरील 26/11 च्या दहशतवादी हल्ल्यात पोलिस अधिकारी, कर्मचारी, जवानांनी मोठा लढा दिला, स्वतःच्या प्राणांचे बलिदान दिले. त्यांच्या या शौर्याला अभिवादन करण्यासाठी शालेय पाठ्यपुस्तकात या घटनेचा समावेश करावा, अशी मागणी पोलिस मित्र संघटनेच्यावतीने पालकमंत्री चंद्रकांत पाटील यांच्याकडे करण्यात आली.

पोलिस मित्र संघटनेच्यावतीने झाशीची राणी लक्ष्मीबाई चौकात मुंबईवरील 26/11 च्या दहशतवादी हल्ल्यात शहीद झालेल्या वरिष्ठ पोलीस अधिकारी, पोलिस कर्मचारी, 'एनएसजी' जवान व नागरिकांना अभिवादन करण्यात आले. यावेळी संघटनेचे अध्यक्ष राजेंद्र कपोते, संदीप खर्डेकर, अरुण जाधव उपस्थित होते. पाटील यांच्यासह परिमंडळ एकचे पोलिस उपायुक्त संदीप सिंग गिल, डेक्कन पोलिस ठाण्याचे वरिष्ठ पोलीस निरीक्षक मुरलीधर करपे, दामिनी पुथकातील पोलिस कर्मचारी यांनी यावेळी शहिदांना पुष्पहार अर्पण करून अभिवादन केले. संघटनेच्यावतीने यावेळी पुणे पोलिस दलास रुग्णवाहिका भेट देण्यात आली.

कपोते म्हणाले, 'मुंबईवरील 26/11 च्या दहशतवादी हल्ल्यातील वीर पुरुषांना आदरांजली अर्पण करण्यासाठी हा कार्यक्रम घेण्यात आला. त्यांचे बलिदान व्यर्थ जाऊ नये, यासाठी या घटनेचा धडा आपल्या शालेय पाठ्यपुस्तकात यावा त्यामुळे नव्या पिढीला प्रेरणा मिळेल किती राज्य सरकारकडे मागणी आहे. तीच खरी श्रद्धांजली ठरेल.'