Six Zika virus infection cases in Pune: काळजी घ्या! पुण्यात झिका विषाणूचा फैलाव, 6 रुग्णांची नोंद, दोन गर्भवती महिलांनाही बाधा

पुण्यामध्ये झिका विषाणूचा प्रसार होताना दिसत आहे. शहरात संसर्गाचे 6 रुग्ण आढळले आहेत. विशेष म्हणजे यामध्ये दोन गर्भवती महिलांचा देखील समावेश आहे.

आरोग्य विभागाच्या अधिकाऱ्यांनी दिलेल्या माहितीनुसार, पुण्यातील एरंडवणे भागातील २८ वर्षीय गर्भवती महिलेमध्ये झिका विषाणूची लागण झाल्याचे आढळून आले आहे. महिलेचा अहवाल पॉझिटिव्ह आला आहे. याशिवाय आणखी 12 आठवड्यांच्या गर्भवती महिलेला झिका व्हायरसची लागण झाल्याचे आढळून आले आहे. सध्या दोन्ही महिलांची प्रकृती स्थिर आहे.

शहरात गर्भवतीला झिकाचा संसर्ग झाल्याचे निदान झाले आहे. आतापर्यंत 'झिका'च्या संसर्गाचे निदान होणाऱ्या रुग्णांमधील गर्भवतींची संख्या दोन झाली आहे. या दोन्ही गर्भवती एरंडवणे परिसरातील रहिवासी आहेत. रोगनिदान झालेल्या रुग्णांनी देशात किंवा परदेशात प्रवासाचा इतिहास नसल्याची माहिती महापालिकेच्या आरोग्य विभागातर्फे देण्यात आली.

गर्भवती महिलांसाठी अधिक धोकादायक

जर गर्भवती महिला झिका विषाणूच्या बळी ठरल्या तर गर्भामध्ये मायक्रोसेफली होऊ शकते. ही अशी स्थिती आहे ज्यामध्ये मेंदूच्या असामान्य विकासामुळे डोके खूपच लहान होते.

मुलीसह डॉक्टरांनाही संसर्ग

पुण्यातील झिका विषाणू संसर्गाचा पहिला रुग्ण एरंडवणे परिसरातच आढळून आला असून, ४६ वर्षीय डॉक्टरचा रिपोर्ट पॉझिटिव्ह आला होता. डॉक्टरांनंतर त्यांच्या 15 वर्षांच्या मुलीचा नमुनाही पॉझिटिव्ह आढळला. याशिवाय मुंढवा परिसरात दोन बाधित लोक आढळले असून त्यापैकी एक 47 वर्षीय महिला आणि दुसरा 22 वर्षीय पुरुष आहे.

पुणे महापालिकेचा आरोग्य विभाग सर्व रुग्णांवर लक्ष ठेवून आहे. अधिकाऱ्यांच्या म्हणण्यानुसार, खबरदारीचा उपाय म्हणून, संक्रमित डासांना रोखण्यासाठी फॉगिंग आणि फ्युमिगेशन यासारख्या उपाययोजना केल्या जात आहेत.

युगांडामध्ये आढळला होता झिकाचा पहिला रुग्ण

झिका विषाणू संक्रमित एडिस डासाच्या चाव्याव्दारे पसरतो. हा डास डेंग्यू आणि चिकुनगुनिया सारख्या विषाणूंचा प्रसार करण्यासाठी देखील ओळखला जातो. 1947 मध्ये युगांडामध्ये हा विषाणू पहिल्यांदा ओळखला गेला.