Pune Tourism | पुणेकरांच्या पर्यटनात चार महिन्यांत ७० टक्के वाढ

पुणे : कोरोनापूर्व काळाच्या तुलनेत पर्यटन क्षेत्र आता ५५ टक्क्यांपर्यंत पोचले आहे. तर जून महिन्यापासून दर महिन्याला पर्यटनात सुमारे ७० टक्के वाढ होत आहे. यात स्थानिक पर्यटनात तब्बल ३०० टक्क्यांची वाढ झाली असून परदेशी पर्यटनाच्या प्रमाणातही ५० टक्के वाढ झाली असल्याचे थॉमस कुक इंडिया संस्थेच्या सर्वेक्षणात आढळले आहे.

संस्थेच्या माइस आणि व्हिसा विभागाचे अध्यक्ष राजीव काळे बुधवारी पत्रकार परिषदेत म्हणाले, ‘‘थॉमस कुक इंडिया’ने कोरोनापूर्व २०१९ मधील सप्टेंबर महिन्यातील स्थिती आणि कोरोना पश्चात २०२१ मधील सप्टेंबर महिन्यातील स्थिती, यांची तुलना करणारे सर्वेक्षण पुण्यात केले. त्यात सहभागी झालेल्या ७७ टक्के व्यक्तींनी याच वर्षात पर्यटन करण्याची इच्छा दर्शवली आहे. तर, ६२ टक्के व्यक्तींनी परदेशी ठिकाणांना पसंती दिली आहे, तर ७८ टक्के व्यक्तींनी स्थानिक पर्यटनाला प्राधान्य दिले आहे.’’

हिमाचल प्रदेश, लेह-लडाख, उत्तराखंड आणि ईशान्य भारतासारख्या ठिकाणांना अधिक पसंती मिळत असल्याची बाबही या सर्वेक्षणातून समोर आली आहे. तर परदेशातील मालदिव, दुबई, स्वित्झर्लंड, फ्रान्स आदी देशांना पसंती मिळते आहे. यातील ५० टक्के पुणेकरांनी कुटुंबासह प्रवास करण्यास तर २० टक्के पुणेकरांनी मित्रमंडळींसह प्रवास करण्याचा पर्याय निवडला आहे. लॉकडाऊनमुळे आलेला थकवा आणि कंटाळा, या वाढत्या मागणीला कारणीभूत ठरत असल्याचे निरीक्षण काळे यांनी या वेळी नोंदवले.