Crime News : 80 हजार रुपये किमतीचा सुमारे आठ किलो गांजा पकडला

खेड-शिवापूर - राजगड पोलिसांनी सोमवारी सकाळी खेड शिवापूर टोल नाक्यावर एका मोटारगाडीतून सुमारे 80 हजार रुपये किमतीचा सुमारे आठ किलो गांजा पकडला. आरोपींच्या ताब्यातील मोटारगाडी आणि गांजा पोलिसांनी जप्त केला आहे. तसेच पोलिसांनी याप्रकरणी पाच जणांना ताब्यात घेतले असून त्यांच्यावर गुन्हा दाखल केला आहे.

ईस्माईल बाबु सय्यद ( वय ३०, रा. कनगल्ला, ता. हुकेरी, जि. बेळगांव, सैफाली शब्बीर सुतार (वय २३, रा. निपानी, ता. हुकेरी, जि. बेळगांव, कर्नाटक, जैनुल गजबार मुल्ला (वय ३५, रा. सोलापूर दर्गा गल्ली, ता.हुकेरी, जि. बेळगांव, कर्नाटक, जिआउल रेहमान रियाज मुजावर (वय २०, रा. हरणापूरगड, ता.हुकेरी, जि. बेळगांव, कर्नाटक, आजु अजगर अल्ली खान (वय २१, रा. माणखुर्द, मुंबई) अशी याप्रकरणी अटक करण्यात आलेल्यांची नावे आहेत.

याबाबत राजगड पोलिसांनी माहिती दिली. सोमवारी सकाळी खेड-शिवापूर टोल नाक्यावर राजगड वाहतूक विभागातील पोलिस कर्मचारी वाहनांवर वाहतूक कारवाई करत होते. यावेळी सकाळी अकरा वाजण्याच्या सुमारास साताऱ्याच्या दिशेने जाणारी एक मोटारगाडी वाहतूक पोलिसांना संशयास्पद वाटली. ही मोटारगाडी बाजूला घेऊन पोलिसांनी त्या मोटारगाडीची तपासणी केली. यावेळी त्या मोटारगाडीत ठेवलेल्या एका प्रवासी बॅगेत गांजा आढळून आला.

पोलिसांनी त्यांच्या ताब्यातील मोटारगाडी आणि सुमारे 80 हजार रुपये किमतीचा आठ किलो गांजा जप्त केला. तसेच याप्रकरणी पाच जणांवर गुन्हा दाखल केला आहे.

राजगडचे पोलिस निरीक्षक सचिन पाटील, साहाय्यक पोलीस निरीक्षक मनोज नवसरे, सचिन कदम, निलेश होवाळ, अमोल सूर्यवंशी, अजित माने, संतोष तोडकर, वाहतूक वार्डन पंकज शिंदे यांनी ही कारवाई केली.