Accident: भोर-कापूरव्होळ मार्गावर डंपरने चिरडल्याने महिलेचा मृत्यू!

कापूरहोळ-भोर मार्गावरील नेकलेस पॉईंटच्या उतारावरील संमगनेर गावच्या हद्दीतील रस्त्यावर डंपरने चिरडल्याने महिलेचा मृत्यु झाला तर तिचा मुलगा थोड़क्यात बचावला.

लताबाई गोपाळ येलमकर (वय ६५, रा. उंदेरी, ता. महाड) असे अपघातात ठार झालेल्या महिलेचे नाव असून सोमवारी (ता.१५) सकाळी ९ वाजता नेकलेस पॉईंटवरून भोरच्या बाजूला असलेल्या उतरावावर हा उपघात झाला.

सुदैवाने लताबाईंचा मुलगा अविनाश येलमकर (वय ३९) हा थोडक्यात बचावला. कापूरव्होळ-भोर-मांढरदेवी या मार्गाच्या रस्त्याच्या दुरूस्तीचे व विस्तारीकरणाचे काम सुरु आहे. त्याची खडी रस्त्यावर पडल्यामुळे आणि ठेकेदाराने सुरक्षीततेच्या उयायोजना न केल्यामुळे महिलेचा जीव गेला आहे.

याबाबत राजगड पोलिसांनी दिलेली माहिती अशी अविनाश येलमकर आपल्या कुटुंबासह खडकवासला (पुणे) येथे कामानिमित्त राहात आहेत. मकरसंक्रांतीच्या सणासाठी ते मूळगाव असलेल्या उंदेरी (ता.महाड, जि.रायगड) येथे आईसमवेत दुचाकीवरून जात होते. सकाळी नऊच्या सुमारास नेकलेस पॉईटच्या उताराला रस्त्यावर पडलेल्या खडीमुळे त्यांची दुचाकी घसरली आणि दोघेही रस्त्यावर पडले.

त्यावेळी समोरून रस्त्याच्या कामासाठी असलेला डंपर येत होता. चढ असूनही डंपरचा वेग जास्त असल्यामुळे लताबाई यांच्या डोक्यावरून डंपरचे चाक गेले. त्यामुळे त्यांचा जागीच मृत्यु झाला तर अविनाश थोडक्यात वाचले.

अपघातानंतर डंपरचालक आणि रस्त्यावर काम करणारे कामगारही पळून गेले. त्यामुळे अपघातग्रस्तांना लगेच उपचार मिळाले नाहीत. घटनेची माहिती मिळताच किकवी दूरक्षेत्राचे पोलीस हवालदार राजेंद्र चव्हाण, तुळशीराम अहिरे, दिलीप अलगुडे यांनी घटनास्थळी धाव घेतली आणि दोघांनाही उपचारासाठी हॉस्पिटलमध्ये दाखल केले. ड़ॉक्टरांनी लताबाईंना मृत घोषीत केले.

ठेकेदाराचे सुरक्षीततेच्या नियमांकडे दुर्लक्ष

कापूरव्होळ-भोर-मांढरदेवी-वाई-सुरुर या रस्त्याच्या क्रॉक्रीटीकरणाचे काम युध्दपातळीवर सुरु आहे. सद्यस्थितीत मांढरदेवीच्या यात्रेला जाणा-या भाविकांमुळे रस्त्यावर वाहनांची गर्दी आहे. मात्र ठेकेदाराने सुरक्षीततेच्या दृष्टीने उपाययोजना केल्या नाहीत. शिवाय रस्त्यावर धूळीचे साम्राज्य नेहमीच असते. मागील आठवड्यात खासदार सुप्रिया सुळे यांनीही सार्वजनिक बांधकांम विभागाच्या अधिका-यांना सुरक्षीततेच्या उपाययोजना करण्याचे आदेश दिले होते.