पुणे : मार्केट यार्डात नियमांचे उल्लंघन करणाऱ्या अडत्यांवर कारवाई!

पुणे : कोरोनाच्या वाढत्या पार्श्वभूमीवर केलेल्या नियमांचे उल्लंघन करणाऱ्या अडते (traders) तसेच डमी अडत्यांवर सोमवारी (दि.१०) बाजार समितीने (Market Yard) कारवाई केली. या कारवाईदरम्यान ५५ जणांकडून जीएसटीसह ५२,१५३ रुपयांचा दंड वसूल करण्यात आला. कृषी उत्पन्न बाजार समितीचे (APMC) प्रशासक मधुकांत गरड यांच्या मार्गदर्शनाखाली तरकारी विभाग प्रमुख दत्तात्रय कळमकर यांनी ही कारवाई केली. (action on traders violating corona rules in Pune market yard)

करोनाचा संसर्ग वाढला आहे. या पार्श्वभूमीवर संसर्ग रोखणे आणि गर्दी कमी करण्यासाठी बाजार समितीने मार्केट यार्डात नियमावली तयार केली आहे. डमी व्यापाऱ्यांवर व्यापार करण्यास बंदी घालण्यात आली आहे. तर, बाजारातील निम्म्या पाकळ्या एक दिवस, दुसऱ्या दिवशी निम्म्या सुरु ठेवण्यात येत आहेत. याशिवाय इतर नियम बनविण्यात आले आहेत. या अनुषंगाने सोमवारी तरकारी विभागात गटप्रमुख डी. बी. वारघडे, डी. जी. थोपटे, एन. जे. राऊत यांनी ही कारवाई केली. पाकळी बंद असताना व्यापार करणाऱ्या व्यापारी आणि बंदी घातली असताना व्यापार करणाऱ्या डमी व्यापाऱ्यांवर ही कारवाई करण्यात आली.

सर्वांनी बाजार समितीला सहकार्य करावं

करोना संसर्गामुळे केलेल्या नियमाची कठोर अंमलबजावणी केली जात आहे. नियम न पाळणाऱ्यावर बाजार समितीच्यावतीने कारवाई करण्यात येत. सर्वांनी बाजार समितीला सहकार्य करावं, असं आवाहन कृषी उत्पन्न बाजार समितीचे प्रशासक मधुकांत गरड यांनी केलं आहे.

फळ विभागात नियमांचे उल्लंघन करणाऱ्यांवर कारवाई

मार्केट यार्डातील फळ विभागात सोमवारी (ता. १०) करोनाच्या नियमाचे उल्लंघन करणाऱ्या पाच जणांवर कारवाई करून पाच हजार नऊशे रुपयांचा दंड वसूल करण्यात आला. विभागप्रमुख बाबासाहेब बिबवे यांच्या मार्गदर्शनाखाली गटप्रमुख बाळासाहेब कोंडे यांनी ही कारवाई केली.