Antigen Kit Scam : ॲटीजेन कीट घोटाळ्याची चौकशी सप्टेंबरपासून सुरूच

पुणे - कोरोना काळात नागरिकांची कोरोना चाचणी करण्यासाठी खरेदी केलेल्या रॅपिड अँटीजेन टेस्ट कीटमध्ये गैरप्रकार झाल्याची तक्रार महापालिका प्रशासनाकडे झालेली असताना त्याची सप्टेंबर महिन्यापासून सुरू झालेली चौकशी अद्यापही संपलेली नाही. मात्र, यावर आता सारवासारव करत येत्या आठड्याभरात अहवाल प्राप्त होईल असा दावा आरोग्य प्रमुख डॉ. आशिष भारती यांनी केला आहे.

महापालिकेच्या वारजे येथील अरविंद बारटक्के दवाखान्यात जानेवारी ते डिसेंबर २०२१ या कालावधीत रॅपिड अँटीजेन टेस्ट कीट खासगी लॅबला विकल्याचा आरोप याच महापालिकेच्या एका निलंबित डॉक्टरकडून करण्यात आला. त्यासंदर्भात रीतसर वारजे पोलिसांकडे तक्रार करण्यात आली होती. पोलिसांनी या तक्रारीची गांभीर्याने दखल घेत त्याच चौकशी केली. त्यामध्ये घोटाळा झाल्याचे सकृतदर्शनी निदर्शनास आल्याने पोलिसांनी महापालिकेने या प्रकरणाची चौकशी करावी असे पत्र सप्टेंबर २०२२ मध्ये महापालिकेला पाठवले. दरम्यान, हा प्रकार लक्षात आल्याने व पोलिसांचे पत्र प्राप्त होण्यापूर्वीच दोन अधिकाऱ्यांची चौकशी समिती गठित करण्यात आली होती.

सप्टेंबर महिन्यात या घोटाळ्याची कुणकूण कोणालाही लागू देण्यात आली नाही. खुद्द अतिरिक्त आयुक्त रवींद्र बिनवडे यांना देखील या प्रकरणाची माहिती तीन दिवसांपूर्वी मिळाली. आरोग्य विभागातील अंतर्गत वाद, कर्मचाऱ्यांवर केली जाणारी कारवाई याची माहिती वारंवर वरिष्ठ अधिकाऱ्यांना दिली जात असताना या प्रकरणाबाबत मात्र वरिष्ठांनाच अंधारात ठेवण्यात आले.

आरोग्य प्रमुख भारती म्हणाले, ‘पोलिसांचे पत्र येण्यापूर्वीच दोन अधिकाऱ्यांकडून या प्रकरणाची चौकशी सुरू केली आहे. त्याचा अहवाल येत्या आठवड्यात प्राप्त होईल. त्यानुसार पुढील कारवाई केली जाईल. ही चौकशी करताना त्यात मुदतीचा उल्लेख नव्हता. लवकरात लवकर चौकशी करून अहवाल सादर करावा असे सांगितले होते.

अतिरिक्‍त आयुक्त बिनवडे म्हणाले, या प्रकरणाची माहितीच मला शनिवारी कळाली आहे. या प्रकरणात पूर्वीच चौकशी समिती नेमली आहे. त्यामुळे आता वेगळी समिती नेमलेली नाही. पण या समितीचा अहवाल योग्य नसल्यास त्रयस्थ संस्थेमार्फत पुन्हा चौकशी केली जाईल.