भारतीय नौदलात अधिकारीपदासाठी अर्ज प्रक्रिया सुरू

पुणे : भारतीय नौदलाच्या वतीने शॉर्ट सर्व्हिस कमिशन (एसएससी) अंतर्गत अधिकारी पदासाठी अर्ज प्रक्रिया सुरू झाली आहे. यामध्ये विविध विभागांसाठी ५० पदांकरिता ही प्रक्रिया राबविण्यात येणार आहे. ही प्रवेश प्रक्रिया केवळ पुरुष उमेदवारांसाठी ठेवली आहे. (application process starts for officer post in indian navy)

कोरोनाच्या पार्श्‍वभूमीवर यंदा लेखी परिक्षा होणार नसून थेट सर्व्हिस सिलेक्शन बोर्डाच्या (एसएसबी) मुलाखती होणार आहेत. त्यासाठी पदवीतील गुणांच्या आधारावर उमेदवारांना एसएसबी प्रक्रियेसाठी निवडण्यात येणार आहे. या प्रवेश प्रक्रियेसाठी मान्यताप्राप्त विद्यापीठाकडून बीई किंवा बीटेक पदवी असलेल्या उमेदवारांना अर्ज भरता येईल. तसेच, उमेदवारांना पदवीत ६० टक्के गुण मिळवलेले असणे आवश्‍यक असून, वयोमर्यादा ही १८ ते २५ पर्यंत ठेवण्यात आली आहे. त्याचबरोबर राष्ट्रीय छात्र सेनेचे (एनसीसी) ‘सी’ सर्टिफिकेट असलेल्या उमेदवारांना पदवीच्या गुणांमध्ये पाच टक्क्यांची सवलत देण्यात येणार आहे. एकूण ५० जागांसाठी असलेल्या या भरती प्रक्रियेत ४७ जागा जनरल सर्व्हिससाठी; तर तीन जागा हायड्रो केडर पदासाठी असणार आहे.

ऑनलाइन अर्ज भरण्यासाठी व यासंदर्भातील अधिक माहितीसाठी उमेदवारांना joinindiannavy.gov.in या नौदलाच्या अधिकृत वेबसाइटचा वापर करता येईल. तसेच, इच्छुक उमेदवारांना २६ जूनपर्यंत ऑनलाइन पद्धतीने अर्ज भरता येईल.