Ashadhi Wari 2024 : मेघांच्या छायेत सुखद वाटचाल ;पालखी सोहळा बरड मुक्कामी,रस्त्याच्या कामांमुळे गैरसोय

बरड : फटलटणकरांचा निरोप घेऊन माऊलींचा पालखी सोहळा काळ्याभोर ढगांच्या साथीने अल्हाददायक वातावरणात बरडमध्ये पोचला. ऊन नसल्याने हरिनामाचा जयघोष आणि टाळ मृदंगाच्या गजराला अधिकच जोर आला होता. गुरुवारी (ता. ११) सोहळा धर्मपुरी येथे सोलापूर जिल्ह्यात प्रवेश करणार आहे.

फलटणकरांचा निरोप देऊन आज सकाळी साडेसहाला माऊलींचा पालखी सोहळा बरडच्या दिशेने मार्गस्थ झाला. फलटणपर्यंतचा अर्धा टप्पा उरकला होता. तेथील भाविक माऊलींच्या दर्शनासाठी आणि निरोप देण्यासाठी विमानतळावर जमा झाले होते. रस्त्याच्या दुतर्फा अबालवृद्धांची गर्दी होती. काकड्याचे अभंग, टाळ मृदंगाचा निनाद आणि भजनाचा ठेका वारीची वाटचाल सुकर करीत होता.

विडणीमध्ये सकाळची न्याहारी करून सोहळा पावणेएकच्या सुमारास पिंप्रदला दुपारच्या जेवणासाठी थांबला. तत्पूर्वी, पालखी पिंप्रदला येण्यापूर्वीच तेथील भाविकांनी दर्शनासाठी आधीपासूनच रांगा केल्या होत्या. तळावर प्रशासनाने खडीकरण केले होते. दुपारचे जेवण करून सव्वादोनच्या सुमारास सोहळा बरडकडे निघाला.

सुखद वाटचाल

ढगाळ हवामान आणि हरिनामाने माऊलींच्या पालखी सोहळ्याची वाटचाल सुखद झाली. दरम्यान, पालखी मार्गाचे काम सुरू असल्याने तेथे वारकऱ्यांना काही प्रमाणात गैरसोयींना सामोरे जावे लागत आहे. विशेषतः उड्डाणपुलांचे काम रखडलेल्या ठिकाणी दिंड्यांना अधिक अडचण येत आहे. दुभाजक आणि साईडच्या कठड्यांमुळे व दिशादर्शक फलक नसल्याने अनेक दिंड्यांना मुक्कामाच्या ठिकाणी पोचण्यास अडचण येत होती.

सोलापूर जिल्ह्यात आज प्रवेश

माऊलींचा पालखी सोहळा पुणे आणि सातारा जिल्ह्याचा प्रवास संपवून गुरुवारी (ता. ११) धर्मपुरी येथे सोलापूर जिल्ह्यात प्रवेश करणार आहे. वारी शेवटच्या टप्प्यात आल्याने वारकऱ्यांमध्ये कमालीची उत्सुकता आहे. यंदा वारीत वारकऱ्यांची संख्या अधिक आहे. त्यामुळे मोकळा वारकरी समाज सोहळ्याच्या पुढे एक मुक्काम चालत आहे. त्यामुळे पुढच्या गावात दोन दिवस गर्दी होत असल्याचे चित्र आहे.