स्वाभिमानीच्या पुणे जिल्हाध्यक्षावर अॅट्रोसिटीचा गुन्हा दाखल

दौंड : पुणे जिल्हा स्वाभिमानी शेतकरी संघटनेचे अध्यक्ष राजेंद्र कदम यांच्याविरूध्द अनुसूचित जाती-जमाती अत्याचार प्रतिबंधक कायद्यातील (Atrocity) कलमान्वये गुन्हा दाखल करण्यात आला आहे. महावितरण कडून थकबाकीदार वीजग्राहकांचे विद्यूत साहित्य जप्त केल्याप्रकरणी आठ दिवसांपूर्वीच राजेंद्र कदम यांनी आंदोलन करून महावितरण प्रशासनाला जप्तीची कारवाई थांबविण्यास भाग पाडले होते. (Pune District Crime News)

दौंड पोलिस ठाण्याचे निरीक्षक विनोद घुगे यांनी या बाबत माहिती दिली. आदिवासी समाजातील एका पस्तीस वर्षीय विवाहितेने या प्रकरणी दौंड पोलिस ठाण्यात फिर्याद दाखल केली आहे. १५ जानेवारी रोजी सदर महिला आलेगाव (ता. दौंड) येथील कदम वस्ती येथे राजाराम उर्फ राजेंद्र शिवाजी कदम यांच्या घराशेजारील गोठ्यात साफसफाईचे काम करून दौंड शहराकडे जाण्यासाठी निघाली होती.

त्यावेळी राजेंद्र कदम यांनी सदर महिलेस दौंड येथे न जाण्यास सांगितले परंतु महिलेने आग्रह केल्याने राजेंद्र कदम यांनी दोन चापटी मारून रबरी पाईपने पाठ आणि पोटरीवर मारले. त्याचबरोबर जातीवाचक शिवीगाळ केल्याचे फिर्यादीत नमूद करण्यात आले आहे.

राजेंद्र कदम यांनी सदर फिर्याद कोणाच्या तरी सांगण्यावरून राजकीय द्वेषापोटी दिल्याचे सांगत त्यात तथ्य नसल्याचा दावा केला. संघटनेच्या माध्यमातून शेतकर्यांची बाजू घेतल्यावर काही लोक अशा तक्रारी करून बदनाम करण्याचा प्रयत्न करीत असल्याचा दावा श्री. कदम यांनी केला.