जयंतीदिनी डॉ. आंबेडकरांचा उल्लेख टाळला

पुणे : डॉ. बाबासाहेब आंबेडकर यांच्या जयंतीदिनी हेतुपुरस्सर उल्लेख न केल्याच्या निषेधार्थ सनदी लेखापालांची संस्था ‘दि इन्स्टिट्यूट ऑफ चार्टर्ड अकाउंटंट्स ऑफ इंडिया’च्या विरोधात रिपब्लिकन पक्षाच्या वतीने मंगळवारी आंदोलन करण्यात आले. या प्रकरणी सीए इन्स्टिट्यूटने खेद व्यक्त करत डॉ. आंबेडकर यांचा यथोचित सन्मान करण्याचे आश्वासन दिले.

बिबवेवाडी येथील ‘आयसीएआय’च्या पुणे शाखेसमोर रिपाइंचे शहराध्यक्ष शैलेंद्र चव्हाण यांच्या नेतृत्वात हे आंदोलन झाले. याप्रसंगी रिपाइंचे प्रदेश सचिव बाळासाहेब जानराव, मातंग आघाडीचे हनुमंत साठे, महिला आघाडीच्या शशिकला वाघमारे, बसवराज गायकवाड, बाबूराव घाडगे, महिपाल वाघमारे, नीलेश आल्हाट, वसंत बनसोडे, मोहन जगताप, उद्धव चिलवंत, श्याम सदाफुले, रामभाऊ कर्वे, बाळासाहेब शेलार, अंबादास कोतले, सुगत धसाडे, बाळू साळवे, प्रकाश निंबाळकर, विक्की शिंदे, सदा शिंगे, सुधाकर राऊत, अर्जुन कांबळे आदी उपस्थित होते.

‘रिपाइं’च्या शिष्टमंडळाने पुणे शाखेचे अध्यक्ष सीए काशिनाथ पाठारे यांच्याकडे निवेदन दिले. सनदी लेखापालांच्या संस्थेने १४ एप्रिल रोजी देशभरातील सनदी लेखापालांना शुभेच्छा संदेश पाठवला होता. त्यात विविध सणांच्या शुभेच्छा दिल्या. परंतु डॉ. आंबेडकर जयंतीचा उल्लेख केला नव्हता. अर्थतज्ज्ञ अशी ओळख असलेल्या डॉ. आंबेडकरांची जयंती जगभर साजरी होते. मात्र, सीए इन्स्टिट्यूट त्यांचा नामोल्लेख टाळते, हे निंदनीय आहे. या संदर्भात सीए इन्स्टिट्यूटच्या दिल्ली कार्यालयानेही जाहीर माफी मागावी, अन्यथा तीव्र आंदोलन केले जाईल, असा इशारा देण्यात आला आहे.