Pune Porsche Car Accident: कल्याणीनगर अपघातातील आरोपीला मद्य देणाऱ्या कोझी व ब्लॅकच्या मालकांसह इतरांचे जामिनासाठी अर्ज; उद्या सुनावणी

पुणे: कल्याणीनगरमधील अपघात प्रकरणातील अल्पवयीन मुलासह त्याच्या मित्रांना टेबलवर मद्य पुरविल्याप्रकरणी अटकेत असलेल्या कोझी व ब्लॅक पबच्या मालकांसह कर्मचाऱ्यांनी जामिनासाठी अर्ज केला आहे. न्यायालयीन कोठडी सुनावल्यानंतर आरोपींनी हा अर्ज केला आहे. त्यावर बुधवारी (ता. २९) सुनावणी होणार आहे.

अपघात झाल्यानंतर अल्पवयीन आरोपीचे वडील व बांधकाम व्यावसायिक असलेले विशाल सुरेंद्रकुमार अग्रवाल (वय ५०, रा. ब्रह्मा सनसिटी, वडगाव शेरी), कोझी पबचे मालक नमन प्रल्हाद भुतडा (वय २५, रा. ए ७, पद्म विलास एन्क्लेव्ह, वानवडी), व्यवस्थापक सचिन अशोक काटकर (वय ३५, रा. साईसदन ए २, तुकाईदर्शन, हडपसर), ब्लॅक पबचे मालक संदीप रमेश सांगळे (वय ३५, रा. ऑस्कर शाळेसमोर, फ्लॅट नं. १०७, पद्मावती हाईट्स, केशवनगर, मुंढवा), कर्मचारी नीतेश धनेश शेवानी (वय ३४ रा. एन आय बी एम) आणि ब्लॅकच्या बार काउंटरच व्यवस्थापक जयेश सतीश गावकर (वय २३, रा. केशवनगर) यांना या गुन्ह्यात अटक करण्यात आलेली आहे. या सर्वांना न्यायालयाने न्यायालयीन कोठडी सुनावली आहे. त्यानंतर अग्रवाल यांना दुसऱ्या गुन्ह्यात अटक करण्यात आली आहे.

दरम्यान न्यायालयीन कोठडीत असलेले नमन प्रल्हाद भुतडा, सचिन अशोक काटकर, संदीप रमेश सांगळे आणि जयेश सतीश गावकर यांनी जामिनासाठी धाव घेतली आहे. या अर्जावर उद्या (ता. २९) सुनावणी होणार आहे.