निवडणुकीच्या तोंडावर महाविकास आघाडीच्या बारामतीच्या उमेदवार सुप्रिया सुळेंना मोठा धक्का बसला आहे. सुप्रिया सुळे यांचे प्रचार प्रमुख असलेले प्रवीण माने यांनी आज अजित पवार गटामध्ये सहभागी होत असल्याचे जाहीर केले आहे. दोन दिवसांपुर्वी उपमुख्यमंत्री देवेंद्र फडणवीस यांनी प्रवीण माने यांची भेट घेतली होती, त्यानंतर ते महायुतीसोबत जाणार असल्याच्या चर्चा सुरू झाल्या होत्या.
दरम्यान आज प्रवीण माने यांनी पत्राकार परिषद घेत आपली भूमिका जाहीर केली आहे. राज्याचे उपमुख्यमंत्री अजित पवार यांच्या बळकटीकरणासाठी, इंदापूरच्या विकासासाठी आणि कार्यकर्त्यांच्या आग्रह यामुळे महायुतीच्या उमेदवार सुनेत्रा पवार यांचा प्रचार करणार असल्याची माहिती पुणे जिल्हा परिषदेचे माजी बांधकाम व आरोग्य सभापती प्रवीण माने यांनी दिली आहे.
इंदापूर येथील माने परिवाराच्या सोनाई निवासस्थानी आयोजित पत्रकार परिषद मध्ये प्रवीण माने बोलत होते. यावेळी बोलताना प्रवीण माने म्हणाले, आज पासूनच महायुतीचा प्रचाराला सुरवात करणार आहे. सुनेत्रा वहिनींनी अनेक कामे केली आहेत. फोरमच्या माध्यमातून लाखो गोर गरीबांची नेत्र तपासणी, बारामती टेक्सटाइल पार्कच्या माध्यमातून नोकऱ्या देण्याचे काम केले. यामुळे अजित पवार यांचे हात बळकट करण्यासाठी राष्ट्रवादीत जात असल्याचे त्यांनी सांगितले आहे.
दरम्यान प्रवीण माने यांनी घेतलेल्या भूमिकेमुळे बारामती लोकसभा मतदारसंघात महायुतीला बळ मिळाले असल्याचे बोलले जाते आहे. दोन दिवसांपूर्वी उपमुख्यमंत्री देवेंद्र फडणवीस यांनी माने यांच्या निवासास्थानी जाऊन भेट घेतली होती. त्यानंतर ते महायुतीसोबत जाणार असल्याच्या चर्चा राजकीय वर्तुळात सुरू झाल्या होत्या.
देवेंद्र फडणवीस यांची प्रविण माने यांच्या भेटीनंतर फडणवीस यांनी प्रसारमाध्यमांना प्रतिक्रिया दिली. “प्रविण माने यांच्यांशी माझे खूप जुने संबंध आहेत. वैयक्तिक संबंध आहेत. ते अनेकवेळा माझ्या घरी येतात. ते बऱ्याच दिवसांपासून माझ्या मागे लागले होते की, इंदापुरात तुम्ही येता पण माझ्याकडे येत नाहीत. त्यामुळे मी कबूल केलं होती की, मी तुमच्याकडे चहा प्यायला येईल. त्यामुळे मी त्यांच्याकडे चहा प्यायला गेलो होतो. ते आमच्यासोबतच आहेत. आमचे जुने सहकारी आहेत”, असं देवेंद्र फडणवीस म्हणाले.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
