बारामती - तालुक्याच्या अनेक भागात गुरुवारी (ता. 21) कमी अधिक प्रमाणात वरुणराजाने हजेरी लावली. टंचाईग्रस्त जळगाव कडे पठार, का-हाटी परिसरात मुसळधार पाऊस झाल्याने सर्वत्र पाणी साचले होते. अजूनही समाधानकारक पाऊस नसल्याने शेतकरी चिंताग्रस्त आहे.
दरम्यान सूत्रांकडून मिळालेल्या माहिती नुसार गुरुवारी तालुक्यातील जळगाव कडेपठार येथे सर्वाधिक म्हणजे 104 मि.मी. पावसाची नोंद झाली आहे. त्या खालोखाल जळगाव सुपे येथे 92 तर का-हाटीमध्ये 40 मि.मी. पावसाची नोंद झाली आहे. या पावसामुळे काहीसा दिलासा मिळालेला असला तरी ज्या दमदार पावसाची शेतक-यांना प्रतिक्षा आहे, तसा पाऊस अजूनही बरसत नसल्याने बळीराजा चिंतेत आहे.
तालुक्यातील सुपे येथे 1 जून पासून 21 सप्टेंबर पर्यंत म्हणजे जवळपास 112 दिवसात अवघा 54 मि.मी. पाऊस झालेला आहे. पळशी 32, जराडवाडी 40, गाडीखेल 68, चौधरवाडी 70, सायंबाची वाडी 77, नारोळी 80, चांदगुडेवाडी 84 मि.मी. इतक्या कमी पावसाची नोंद झाली आहे.
टंचाईचे तीव्र सावट बारामती तालुक्यावर असून दमदार पाऊस न पडल्यास रब्बीचा हंगाम तर हातातून जाईलच मात्र त्याचा आगामी काळातील पिकांवरही विपरीत परिणाम होईल, अशी भीती शेतकरी व्यक्त करत आहेत.
मिलिंद संगई, बारामती.
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
