तुम्ही मास्क का घातला नाही? एवढंच विचारलं अन् मग...

पुणे : विना मास्क सोसायटीत आलेल्या तरुणांना हटकल्यावरून झालेल्या भांडणात चौघांनी एकास बांबू आणि लाथा-बुक्क्यांनीे बेदम मारहाण केली. आंबेगाव खुर्दमधील हनुमाननगरमध्ये सोमवारी (ता.२०) सायंकाळी हा प्रकार घडला. याप्रकरणी भारती विद्यापीठ पोलिसांनी तिघांना अटक केली आहे. 

- ताज्या बातम्यांसाठी डाऊनलोड करा ई-सकाळचे ऍप

कृष्णा बबन लोखंडे (वय-२२), अजय भागवत घाडगे (वय-२१ दोघे रा. शनिनगर, आंबेगाव खुर्द) आणि अनिल संभाजी नेटके (वय-२१, रा. लिपाणे वस्ती, आंबेगाव खुर्द) अशी अटक केलेल्या आरोपींची नावे आहेत. त्यांच्यासह चौघांविरोधात गुन्हा दाखल करण्यात आला आहे. या प्रकरणी अमित पाटील (वय-३९, रा. आंबेगाव खुर्द) यांनी भारती विद्यापीठ पोलिस ठाण्यात फिर्याद दिली आहे.

- पालावरच्या जगात कसला कोरोना अन् कसलं अंतर, उघड्या आकाशाखाली जगणं निरंतर!​

फिर्यादी राहत असलेल्या आंबेगाव खुर्द येथील साईसमर्थनगरी सोसायटीच्या पार्किंगमध्ये आरोपी मास्क न घालता उभे होते. त्यामुळे फिर्यादी पाटील यांनी त्यांना हटकले. तुम्ही मास्क का घातला नाही? अशी त्यांना विचारणा केली. त्यावरून चौघा आरोपींनी फिर्यादीसोबत वाद घातला आणि त्यांना मारहाण केली. आरोपींनी फिर्यादींना लाथा-बुक्क्यांनी तसेच बांबूने मारहाण केली.

त्यामध्ये फिर्यादीच्या डोळ्याला, चेहऱ्यास तसेच उजव्या हातास मार लागल्याने ते जखमी झाले आहेत. या घटनेची माहिती मिळताच भारती विद्यापीठ पोलिसांनी तीन आरोपींना अटक केली आहे. पुढील तपास सहायक निरीक्षक ए. आर. कवठेकर करीत आहेत.

- पुण्याच्या बातम्या वाचण्यासाठी येथे क्लिक करा

(Edited by : Ashish N. Kadam)