Pune Crime: शिवाजीनगर परिसरात नदीत सापडला अनोळखी व्यक्तीचा मृतदेह; शहर परिसरात खळबळ

पुणे शहरातून एक धक्कादायक घटना समोर आली आहे. पुण्यातील मुठा नदीमध्ये एका व्यक्तीचा मृतदेह आढळल्याने परिसरात एकच खळबळ उडाली आहे. शिवाजीनगर परिसरात दगडी पुलाखाली हा मृतदेह आढळला असून याबाबतची माहिती मिळताच पोलिसांनी घटनास्थळी धाव घेतली आहे.

मिळालेल्या माहितीनुसार, शिवाजीनगर परिसरातील दगडी पुलाखाली आज सकाळी साडेदहा वाजण्याच्या सुमारास एक मृतदेह पाण्यावर तरंगताना आढळला. याबाबतची माहिती नागरीकांनी तात्काळ पोलिसांना दिली. त्यानंतर पोलिसांनी तात्काळ घटनास्थळी धाव घेतली त्यानंतर मृतदेह नदीतून बाहेर काढला. मृतदेह पुरुष व्यक्तीचा असून त्याचे वय 55 ते 60 च्या आसपास असण्याची शक्यता वर्तवली जात आहे.

तसेच या व्यक्तीच्या डोक्याला मार लागलेला असून गुडघ्यालादेखील जखम झाली आहे. या व्यक्तीची ओळख अद्याप पटली नसून ही हत्या आहे, का आत्महत्या याचा तपास करण्याचे मोठे आव्हान पोलिसांसमोर आहे. अधिक तपास पोलिसांकडून सुरू आहे.