दहा भाषांत होणार ‘खारीच्या वाटा’ या पुस्तकाचा अनुवाद

पुणे - ज्येष्ठ लेखक ल. म. कडू लिखित ‘खारीच्या वाटा’ या पुस्तकाचा आता दहा भाषांमध्ये अनुवाद होणार आहे. २०१७ मध्ये साहित्य अकादमीचा पुरस्कार मिळालेले हे पुस्तक साहित्य अकादमीतर्फेच आता अनुवादित करण्यात येत आहे. याबाबतचे पत्र साहित्य अकादमीतर्फे नुकतेच कडू यांना प्राप्त झाले.

या पुस्तकाचा हिंदी आणि इंग्रजीसह डोंगरी, कोकणी, मैथिली, मणिपुरी, नेपाळी, राजस्थानी, बोडो आणि संताली या भाषांमध्ये अनुवाद करण्यासाठी परवानगी द्यावी, अशी विनंती करणारे पत्र साहित्य अकादमीतर्फे कडू यांना आले आहे. ‘कुमार गटातील मुलांच्या भावविश्वाची आपल्याकडे फारशी दखल घेतली जात नाही, अशी मला खंत होती. त्यातूनच हे पुस्तक आकाराला आले. आता दहा भाषांमध्ये त्याचा अनुवाद होत असल्याने अधिकाधिक लोकांपर्यंत माझे म्हणणे पोहोचेल, याचा मनस्वी आनंद झाला आहे. तसेच, एक मराठी पुस्तक यानिमित्ताने राष्ट्रीय स्तरावर जात असल्यानेही आनंद द्विगुणित झाला आहे’, अशी भावना ल. म. कडू यांनी व्यक्त केली.

हे पुस्तक किशोरवयीन मुलांच्या भावविश्वावर आधारित आहे. एका निसर्गरम्य खेड्यातील दोन किशोरवयीन मित्र आणि त्यांनी पाळलेली खार, यांची अलवार कथा यात सांगण्यात आली आहे. ती खार त्या दोघांना निसर्गातल्या विविध गोष्टी अनुभवायला शिकवते. नंतर मात्र गावात धरण बांधले जात असल्याने त्या मुलांना कुटुंबासह गाव सोडावे लागते, पण ती खार तिथेच राहते. उमलत्या वयातल्या मुलांचे भावविश्व नेमकेपणाने उलगडून दाखवण्याचा प्रयत्न या पुस्तकातून कडू यांनी केला आहे. राजहंस प्रकाशनने हे पुस्तक प्रकाशित केले आहे.