मेंदूच्या समस्यांवर ‘ब्रेननेक्‍स्ट’चा उपाय

पुणे - वेगवेगळ्या कारणांनी मेंदूला होणारी इजा तसेच आजारांमुळे स्मरणशक्ती व आकलन कार्यक्षमतेच्या समस्या उद्‌भवत असल्याचे तुम्ही अवतीभवती पाहिले असेल. अशा समस्यांवर नेमके कोणतेही रामबाण औषध नसते. दीर्घकालीन पुनर्वसन, हाच यावरचा सर्वोत्तम पर्याय. याच शास्त्रीय आधाराचा वापर करून ‘ब्रेननेक्‍स्ट टूल किट’ तयार करण्यात आले 
आहे.

रुग्णाच्या पुनर्वसनासाठी ‘ब्रेननेक्‍स्ट टूल किट’मध्ये पाचशे प्रकारचे मेंदूचे व्यायाम आहेत. त्यासाठी १८ संच निर्माण केले आहेत. रुग्णाची स्मरणशक्ती व बौद्धिक कार्यक्षमता यात अचूकपणे ओळखता येते. तसेच, त्यातील तूट भरून भरून काढण्यासाठी ‘ब्रेननेक्‍स्ट’ची भूमिका महत्त्वाची आहे. अशा प्रकारचे ‘ब्रेननेक्‍स्ट’ म्हणजेच स्मरणशक्ती व आकलनक्षमता केंद्र संचेती हॉस्पिटलमध्ये स्थापन करण्यात आले आहे. पुण्यातील हे अशा प्रकारचे पहिले केंद्र आहे. अपस्मार, अल्झायमर, स्ट्रोक, मायग्रेन, मेंदू विकासात्मक विकार, त्याचे दुर्मीळ संसर्ग व आजार, मेंदूला झालेली इजा व त्यामुळे झालेला आघात, पार्किंसन्स, डिमेन्शिया यांसारख्या आजारांमुळे स्मरणशक्ती व मेंदूच्या आकलन कार्यक्षमतेवर मोठा प्रभाव पडतो. 

या आजारांकरिता नेमके कुठलेही औषध नसल्याने रुग्णांचे दीर्घकालीन पुनर्वसन करणे हाच पर्याय आहे. त्यासाठी ‘संचेती इन्स्टिट्यूट ऑफ ऑर्थोपेडिक्‍स अँड रिहॅबिलिटेशन’तर्फे मेंदूविकारतज्ज्ञ डॉ. मंगल कर्डिले यांच्या सहयोगाने केंद्र स्थापन करण्यात आले आहे. ‘ब्रेननेक्‍स्ट’ संकल्पनेला ‘इंडियन ॲकॅडमी ऑफ न्यूरोलॉजी’ची मान्यता मिळाली असल्याची माहिती ज्येष्ठ अस्थिरोगतज्ज्ञ डॉ. के. एच. संचेती यांनी दिली.