कोरोना बाधित रुग्णांसाठी कॅशलेस सेवा पण लूट सुरूच 

पुणे - कोरोनावरील उपचारासाठी 72 वर्षीय वडिलांना येथील एका खासगी रुग्णालयात दाखल केले होते. त्या रुग्णालयाने मोफत उपचार केले. परंतु रुग्णालयाने रेमडीसिव्हर इंजक्‍शन बाहेरून आणण्यास सांगितले. तुटवडा असल्यामुळे ते इंजक्‍शन मिळत नव्हते. शेवटी रुग्णालयाने त्या सहा इंजेक्‍शनचे 32 हजार चारशे रुपये घेतले. परंतु शेवटी वडिलांचे निधन झाले. सगळंच संपलं... पद्मावती कॉर्नर येथील त्यांचा मुलगा सांगत होता. या घटनेवरून सरकार मोफत उपचार करीत असल्याचा दावा करीत असले तरी रुग्णांची लूट सुरूच असल्याचे समोर येत आहे. 

कोरोना बाधितांवर मोफत उपचार : 
कोरोना बाधित रुग्ण गरीब, मध्यमवर्गीय असो की श्रींमत. शिधापत्रिका पिवळी, केशरी असो की पांढरी. राज्यातील साडेअकरा कोटी नागरिकांचा महात्मा ज्योतिबा फुले जन आरोग्य योजनेत समावेश करून घेतला आहे. अशा सर्व रुग्णांवरील उपचाराचा खर्च या योजनेतून करण्यात येत आहे. राज्य सरकार प्रत्येक व्यक्‍तीमागे अठराशे रुपये विमा कंपनीला देते. जेणेकरून नागरिकांना ही सेवा उपलब्ध होऊ शकेल, असे राज्य सरकारच्या वतीने स्पष्ट करण्यात आले आहे. 

ताज्या बातम्यांसाठी डाऊनलोड करा ई-सकाळचे ऍप

महात्मा ज्योतिबा फुले जन आरोग्य योजना : 
उद्देश : कोरोनासह गंभीर आजारांवरील उपचारांसाठी रुग्णालयांमधून मोफत आरोग्य सुविधा देणे अधिक माहितीसाठी संकेतस्थळ : www.jeevandayee.gov.in 

एकूण लाभार्थी संख्या - 5 हजार 327 

पुणे महापालिका क्षेत्र : 2 हजार 609 
पिंपरी-चिंचवड महापालिका क्षेत्र: 2 हजार 31 
ग्रामीण क्षेत्र : 687 

या योजनेंतर्गत रुग्णालयांनी कोणत्याही रुग्णांकडून पैसे घेऊ नये. पैसे घेतल्यास पाचपट दंड आकारण्याचे अधिकार जिल्हाधिकाऱ्यांना दिले आहेत. कोणत्याही व्यक्‍तीची तक्रार आल्यास संबंधित रुग्णालयावर कारवाईच्या सूचना जिल्हाधिकाऱ्यांना दिल्या आहेत. त्या रुग्णालयास या योजनेच्या यादीतून काढून त्यांच्यावर गुन्हा दाखल करण्यात येईल. 
- राजेश टोपे, आरोग्य मंत्री 

पुण्याच्या बातम्या वाचण्यासाठी येथे ► क्लिक करा

कोरोनाबाधित रुग्णांची आर्थिक पिळवणूक होवू नये, याबाबत रुग्णालयांनी खबरदारी घ्यावी. काही रुग्णालयांनी जास्त रुग्णांना लाभ दिला आहे, ही समाधानकारक बाब आहे. परंतु काही रुग्णालये रुग्णांना अपेक्षित लाभ देण्यात कमी पडले आहेत. अशा रुग्णालयांनी संवेदनशीलतेने कोरोना बाधित रुग्णांना मदत करावी. 
- डॉ. राजेश देशमुख, जिल्हाधिकारी 

जगभरातील इतर बातम्या वाचण्यासाठी येथे क्लिक करा