पुणे - सीईटी सेलतर्फे तंत्रशिक्षण विभागाअंतर्गत अभियांत्रिकीसह अन्य पदवी व पदव्युत्तर पदवी अभ्यासक्रमांची प्रवेश प्रक्रिया राबविली जात आहे, पण अनेक विद्यार्थ्यांकडे जात प्रमाणपत्र, आर्थिकदृष्ट्या दुर्बल घटकांचे (इडब्ल्यूएस) प्रमाणपत्र नसल्याने आरक्षणाचा लाभ मिळत नाही. त्यामुळे या विद्यार्थ्यांना 20 जानेवारी पर्यंत प्रमाणपत्र सादर करण्याची मुदतवाढ देण्यात आली आहे. सीईटी सेलने याबाबत परिपत्रक काढून स्पष्ट केले आहे.
सीईटी सेलकडून अभियांत्रिकी, फार्मसी, एमबीए, आर्किटेक्‍चर, एमटेक, एम आर्च, हॉटेल मॅनेजमेंट यासह इतर अभ्यासक्रमांची प्रवेश प्रक्रिया सुरू आहे. काही अभ्यासक्रमांची पहिली फेरी जाहीर झाली आहे, तर काहींची दुसरी फेरी सुरू झालेली आहे. मराठा आरक्षणास स्थगिती आल्यामुळे या प्रवर्गातील विद्यार्थ्यांना खुला किंवा "इडब्ल्यूएस' प्रवर्गातून अर्ज भरावे लागत आहे. "इडब्ल्यूएस' प्रवर्गातून प्रवेश मिळण्यासाठी प्रमाणपत्राची गरज आहे. तसेच अनेक पालकांनी जात पडताळणी प्रमाणपत्र, एनसीएल मूळ प्रमाणपत्र प्रवेश घेताना गरजेचे आहे.
ऑनलाइन प्रवेशासाठी नोंदणी करताना विद्यार्थ्यांनी प्रमाणपत्र काढण्यासाठी केलेल्या अर्जाची पावती जोडून या प्रक्रियेत सहभाग घेतला आहे. पण प्रवेश घेताना मूळ प्रमाणपत्र आवश्‍यक आहे, अन्यथा या विद्यार्थ्यांना खुल्या गटातून प्रवेश घ्यावा लागतो. त्याचा आर्थिक भुर्दंडही पालकांना बसतो. त्यामुळे प्रमाणपत्र सादर करण्याची मुदत वाढवावी अशी लेखी व तोंडी तक्रार अनेक पालकांकडून केली जात होती. अखेर त्यास सीईटी सेलने परिपत्रक काढून मुदत वाढविली आहे.
जात पडताळणी, इडब्ल्यूएस आणि एनसीएल या तीन प्रमाणपत्रासाठी अर्ज केल्याची पावती ऑनलाइन अर्ज करताना सोडलेली आहे, अशा विद्यार्थ्यांना मूळ प्रमाणपत्र सादर करण्यासाठी 20 जानेवारी रोजी सायंकाळी पाच पर्यंतची मुदत देण्यात आली आहे. तर प्रवेश प्रक्रियेचे सुधारित वेळापत्रक 18 जानेवारी रोजी www.mahacet.org या संकेतस्थळावर जाहीर केले जाईल, असे सीईटी सेलने स्पष्ट केले आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.