Chakan Traffic : चाकणच्या वाहतुक कोंडीवर पर्याय! अवजड वाहनांना ठराविक काळाकरता केली प्रवेश बंदी

चाकण - येथील पुणे -नाशिक महामार्गावरील तळेगाव चौकातून तळेगाव, मुंबई बाजूकडे व चाकण बाजूकडून शिक्रापूर, रांजणगाव बाजूकडे तसेच पुणे -नाशिक महामार्गाने अवजड वाहनांना येण्या-जाण्यास ठराविक काळाकरिता बंदी घालण्यात आली आहे.

चाकण तसेच इतर औद्योगिक क्षेत्राला जोडणाऱ्या या मार्गावरून चाकणच्या तळेगाव चौकातून शिक्रापूर तसेच तळेगाव बाजूकडे येणाऱ्या -जाणाऱ्या अवजड वाहनांना वाहतूक कोंडी सोडविण्याकरिता सुरळीत करण्याकरता तसेच होणाऱ्या किरकोळ व गंभीर अपघातांना प्रतिबंध करण्याकरता पिंपरी-चिंचवड वाहतूक शाखेचे पोलीस उप आयुक्त विशाल गायकवाड यांच्या आदेशानुसार सकाळी आठ ते 11 वाजेपर्यंत तसेच सायंकाळी पाच ते रात्री आठ वाजेपर्यंत बंदी करण्यात येत आहे.

अधिसूचना आज ता. 3 ला काढल्याने उद्यापासून सकाळी आठ ते 11 या वेळेत तसेच सायंकाळी पाच ते आठ या वेळेत या मार्गावर अवजड वाहने वाहन चालकांनी घेऊन येऊ नये असे आवाहन पिंपरी -चिंचवड वाहतूक शाखेच्या वतीने करण्यात आलेले आहे. पिंपरी- चिंचवड वाहतूक शाखेचे पोलीस उपआयुक्त विशाल गायकवाड यांनी अधिसूचना प्रसिद्ध केलेली आहे.