नवाब मलिकांना मंत्रिमंडळातून काढण्याचा ठाकरी बाणा मुख्यमंत्री दाखवणार का?

पुणे: महाविकास आघाडी सरकारमधील काँग्रेस आणि राष्ट्रवादी काँग्रेसचे नेते संविधान वाचवा, असे म्हणत आहेत. त्यामुळे संविधानाचा मान ठेवून नवाब मलिक यांना मंत्रिपदावरून निलंबित केले पाहिजे. मलिक यांना सत्तेच्या लाचारीसाठी मंत्रिपदावर ठेवणे हा महाराष्ट्राचा अपमान आहे. मलिक यांची मंत्रिमंडळातून हकालपट्टी करून उद्धव ठाकरे ठाकरी बाणा दाखवणार का? असा सवाल भाजपचे प्रदेश उपाध्यक्ष माधव भंडारी यांनी गुरुवारी (ता. २४) पत्रकार परिषदेत केला.

भंडारी म्हणाले, ‘‘सरकारी अधिकाऱ्याला लागू असलेले भत्ते मंत्र्यांना देखील मिळतात. त्यामुळे अधिकाऱ्यांना लागू असलेले नियम देखील मंत्र्यांना लागू झाले पाहिजे. मलिक यांना पाठिंबा देणे म्हणजे नागरिकांची चेष्टा केल्यासारखे आहे. दाऊदचा हस्तक असल्याचा आरोप हा देशद्रोहाएवढाच गंभीर असल्याने असा ठपका असलेला मंत्री राज्याच्या मंत्रिमंडळात असणे सुरक्षेच्या दृष्टीने धोकादायक आहे. मुंबई महापालिकेसह अन्य निवडणुकांवर डोळा ठेवून मुस्लिमांच्या अनुनयाकरिता देशद्रोही दाऊदच्या हस्तकास अभय देण्याचे राजकारण ठाकरे सरकारच्या अधोगतीस कारणीभूत ठरेल.

मुख्यमंत्र्यांनी बाळासाहेबांच्या ठाकरी बाण्यास मूठमाती दिली :

मुख्यमंत्री ठाकरे यांनी याआधी भर विधिमंडळात भ्रष्ट पोलिस अधिकारी सचिन वाझे याची पाठराखण केली होती. त्यानंतर खंडणीखोर अनिल देशमुख यांनाही पाठीशी घालण्याचे आटोकाट प्रयत्न केले. केवळ सत्ता टिकविण्यासाठी भ्रष्ट, लाचखोर, खंडणीखोर सहकाऱ्यांना वाचविताना ठाकरे यांनी बाळासाहेबांच्या ठाकरी बाण्यास मूठमाती दिली, असा आरोप भंडारी यांनी केला.