स्वच्छ सर्वेक्षण २०२३, माझी वसुंधरा ३.० अंतर्गत प्लॅस्टिक मुक्त इंदापूरसाठी जनजागृती वारी

इंदापूर : स्वच्छ सर्वेक्षण २०२३, माझी वसुंधरा ३.० व जगतगुरु संतश्रेष्ठ श्री तुकाराम महाराज पालखी सोहळ्याच्या पार्श्वभूमीवर इंदापूर शहरात प्लॅस्टिक मुक्त इंदापूर, प्रदूषण मुक्त वारी,तंबाखू, गुटखा बंदी अभियान तसेच पर्यावरण संतुलनसाठी हरित वारीचा उपक्रम राबविण्यात आला. यावेळी आठवड्यात जप्त करण्यात आलेल्या ६० किलो प्लॅस्टिकवर २५ हजार रुपयांची दंडात्मक कारवाई करण्यात आली.नगरपरिषद मुख्याधिकारी रामराजे कापरे यांच्या नेतृत्वाखाली शहर बाजारपेठेतून ही अभिनव वारी पार पडली. यावेळी वारीत फळ विक्रेते तसेच व्यापाऱ्यांना कापडी पिशव्यांचे वाटप करण्यात आले.

यावेळी मुख्याधिकारी रामराजे कापरे म्हणाले, शहरातील व्यापाऱ्यांनी १ जुलै पासून ७५मायक्रान प्लॅस्टिक न वापरल्यास त्यांना दंडात्मककारवाईस सामोरे जावे लागेल.शहरात येणारा संत तुकाराम महाराज पालखी सोहळा ही अध्यात्मिक पर्वणी आहे.त्यामुळे प्रदूषणमुक्त वारी होण्यासाठी सर्वांनी प्राधान्य देणे गरजेचे आहे. पर्यावरण संतुलन व हरित वारीसाठी सर्वांनी सकारात्मक योगदान देणे गरजेचे आहे.तंबाखू व गुटखा खाऊनसार्वजनिक जागेवर थुंकणाऱ्या,उघड्यावर लघवी व शौचास बसणाऱ्या तसेच उघड्यावर कचरा टाकणाऱ्या नागरिकांवर दंडात्मक कारवाई करण्याचा इशारा त्यांनी दिला. इंदापूरकरांनी शहर व आपला परिसर स्वच्छ, सुंदर, हरित ठेवून शहराचा नावलौकिक वाढवावा असे आवाहन त्यांनी केले. .या अभिनव दिंडीत नगरपरिषदेचे सर्व अधिकारी व कर्मचारी सहभागी झाले होते. सर्वांनी शेवटी वसुंधरा संवर्धन करण्याची सामूहिक शपथ घेवून हरित दिंडीचा समारोप नगरपरिषद प्रांगणात करण्यात आला.