पुण्यात निर्बंध कायम, दिलासा नाहीच; महापालिकेचे नवे आदेश

पुणे - दुकानांच्या वेळा वाढवा अशी मागणी व्यापाऱ्यांकडून केली जात असली तरी महापालिकेने त्यासंदर्भात कोणताही निर्णय घेतलेला नाही. शहरात यापुढेही आत्तापर्यंतचे नियम लागू राहणार आहेत. महापालिका आयुक्त विक्रम कुमार यांनी यासंदर्भात आज (शनिवारी) आदेश काढले आहेत. पुणे शहरातील कोरोना रुग्णांची संख्या नियंत्रित असून, गेल्या महिन्याभरापासून बाधितांचा दर देखील पाच पेक्षा कमी आहे. त्यामुळे राज्य शासनाच्या नियमानुसार पुण्याचा स्तर दोन मध्ये समावेश होतो. मात्र, तिसऱ्या लाटेच्या पार्श्‍वभूमीवर राज्य सरकारने राज्यभरात तिसऱ्या स्तरातील नियम लागू केल्याने पुण्यात निर्बंध वाढले आहेत.

गेल्या अनेक दिवसांपासून व्यापाऱ्यांकडून, मॉल चालकांकडून पुण्यातील निर्बंध शिथिल करा अशी मागणी केली जात होती. यासंदर्भात उपमुख्यमंत्री अजित पवार यांनी यासंदर्भात मुख्यमंत्र्यांशी चर्चा करून निर्णय घेतला जाईल असे स्पष्ट केले होते.

सध्याच्या निर्बंधानुसार दुकाने दुपारी चार पर्यंत सुरू ठेवण्याची परवानगी आहे. तर अत्यावश्यक सेवा वगळता इतर सर्व दुकानांना शनिवारी व रविवारी बंद ठेवावी लागत आहेत. यामध्ये शिथीलता देऊन दुकाने उघडे ठेवण्याची वेळ किमान सायंकाळी आठ पर्यंत केली जावी अशी मागणी केली जात होती. या आदेशांची मुदत आज (३१ जुलै) संपत होती. त्यामुळे महापालिका आयुक्त कुमार यांनी आज नव्याने निर्बंधांचे आदेश काढले असले तरी यात पूर्वीचे नियम कायम ठेवले आहेत. तसेच शहरातील शाळा, महाविद्यालये यासह सर्व शैक्षणिक संस्था बंद असतील. आॅनलाइन शिक्षण सुरू असेल, असेही आदेशात नमूद केले आहे. हे आदेश पुणे कॅन्टोन्‍मेंट व खडकी कॅन्टोन्मेंट बोर्डाला देखील लागू आहेत.

‘‘दुकानांची वेळ सायंकाळी आठ पर्यंत असावी आणि शनिवार-रविवारी देखील दुकाने सुरू असावेत अशी आमची मागणी आहे. यासाठी वारंवार पाठपुरावा देखील सुरू आहे. उपनगरे व ग्रामीण भागात नियमांची कडक अंमलबजावणी नाही, पण शहराच्या मध्यवर्ती भागात कडक नियम आहेत. याचा परिणाम व्यवसायावर होत असून, आमचे ग्राहक तुटत आहेत. त्यामुळे दुकानांची वेळ वाढविणे आवश्‍यक आहे. महापालिका त्याबाबत निर्णय घेत नसल्याने आमचे मोठे नुकसान होत आहे.’’ -राहुल बोरा, अध्यक्ष, लक्ष्मी रस्ता व्यापारी संघटना