जलतरण तलाव अन् खेळाची मैदाने सुरू करा; अजित पवार यांचे आदेश

पुणे : शहर व जिल्ह्यातील खेळाडूंची गैरसोय टाळण्यासाठी खेळाची मैदाने आणि खेळाडू व कोरोना लसीचे दोन डोस घेतलेल्यांसाठी जलतरण तलाव सुरू करावेत, असा आदेश पालकमंत्री अजित पवार यांनी शनिवारी (ता.२२) दिला आहे.(Corona Start swimming pool and playground orders of Ajit Pawar)

पालकमंत्री पवार यांनी शनिवारी शहर व जिल्ह्यातील कोरोना संसर्गाचा आढावा घेतला. या बैठकीत बोलताना त्यांनी हा आदेश दिला. यावेळी विधान परिषदेच्या उपसभापती डॉ.निलम गोऱ्हे, खासदार वंदना चव्हाण, पुण्याचे महापौर मुरलीधर मोहोळ, पिंपरी चिंचवडच्या उषा ढोरे, जिल्हा परिषद अध्यक्षा निर्मला पानसरे, विभागीय आयुक्त सौरभ राव, जिल्हाधिकारी डॉ.राजेश देशमुख, मुख्य कार्यकारी अधिकारी आयुष प्रसाद आदी उपस्थित होते.

पवार म्हणाले, "खेळाडूंसाठी खेळाची मैदाने आणि जलतरण तलाव सुरू करणे गरजेचे आहे. जलतरण तलाव खेळाडुंबरोबरच कोरोना लसीचे दोन डोस घेतलेल्यांसाठीही खुली केली पाहिजेत. त्यामुळे ती तातडीने सुरू करा. मात्र खेळाडूंनीसुद्वा कोरोना लसीचे दोन डोस घेतलेले असले पाहिजेत. याबाबत संबंधित अधिकाऱ्यांना सूचना देण्यात याव्यात. भीमाशंकर देवस्थानच्या ठिकाणी नागरिकांना दर्शनाची अनुमती द्यावी. लेण्याद्री देवस्थानाबाबतही लवकरच निर्णय घेण्यात यावा. पर्यटनस्थळांच्या ठिकाणी छोट्या व्यावसायिकांना त्यांचे व्यवसाय सुरू करण्याची मुभा द्यावी."