Pune Crime : माळेगावात प्रमोद जाधव यांच्याविरुद्ध खंडणीचा गुन्हा

माळेगाव : अल्पवयीन भाच्याबरोबर मामाने अ नैसर्गिक संबंध ठेवल्याची खोटी तक्रार लिहून घेतली व संबंधित मामाकडून वेळोवेळी माळेगाव बुद्रूक (ता.बारामती) येथील ग्राहक संरक्षण परिषदेच्या अशासकीय सदस्याने चार लाख रुपये खंडणी मागितल्याची माहिती आज उशिरा पुढे आली. ३ मे ते ३१ जुलै २०२४ या कालावधीत माळेगाव तसेच जिल्हाधिकारी कार्य़ालय पुणे या ठिकाणी हा प्रकार घडला आहे.

त्या प्रकरणी अभिजीत संपतराव शिंदे (वय 30, रा.दंडवाडी, सुपे ता.बारामती) यांनी अशासकिय सदस्य प्रमोद मानसिंग जाधव (रा.माळेगाव बुद्रूक) यांच्या विरुद्ध माळेगाव पोलिस ठाण्यात फिर्य़ाद दिली.`` प्रमोद जाधव याने माळेगाव येथील मधुरा रेसिडन्सीमधील ऑफिसमध्ये नेऊन आमच्या अल्पवयीन भाच्याकडून दमबाजी करुन अनैसर्गीक संबंध केल्याचा खोटा तक्रारी अर्ज लिहून घेतला. तसेच त्याबाबतचा अर्धनग्न अवस्थेतील मोबाईवर व्हिडीओ बनविला.

या खोट्या तक्रारीचा व व्हिडीओचा आधार घेत जाधव याने मला चार लाख रुपये खंडणीची मागणी केली. तसेच जाधव यांनी चार लाख रुपयांपैकी २५ हजार रुपयांची खंडणी आज (बुधवारी) स्वीकारली. तसेच माझा अल्पवयीन भाच्याची बदनामी केली, `` अशी तक्रार अभिजित शिंदे यांनी फिर्य़ादिमध्ये नमूद केली. उपलब्ध फिर्य़ादीच्या आधारे पोलिसांनी संशयित आरोपी प्रमोद जाधव यांच्या विरुद्ध खंडणीची मागणी करणे, बाल लैंगिक आत्याचार कायद्यांतर्गत पोलिसांनी गुन्हा दाखल केला व जाधव याला अटक केली. या प्रकरणाचा पुढील तपास फौजदार खटावकर करीत आहेत.