नसरापूर येथे मोटारीसह भाडे न दिल्याने पिता-पुत्रांवर गुन्हा

नसरापूर, ता. ३० ः मोटारीचा करारनामा करून भाड्याने घेतली. त्यानंतर मोटारीचे भाडे व मोटार परत देण्यास नकार दिल्याने दोघांविरुध्द फसवणुकीचा गुन्हा राजगड पोलिस ठाण्यात दाखल केला आहे.

परिष अरविंद जाधव (वय ३५, रा. वाघजवाडी ता.भोर) यांनी याबाबत राजगड पोलिस ठाण्यात तक्रार दिली आहे.
जितेंद्र पांडुरंग कुंभार (रा. चेलाडी नसरापूर ता.भोर), त्यांचा मुलगा राहुल जितेंद्र कुंभार (रा. नायगाव ता.भोर) या दोघांनी १५ जून २०२३ रोजी परिष जाधव यांची मोटार कापुरव्होळ येथून भाड्याने घेतली. त्यानंतर १ डिसेंबर २०२३ रोजी राहुल कुंभार याच्याबरोबर भाडेकरार करून दर महिना २५ हजार रुपये देण्याचे ठरले. परंतु, कुंभार याने चार महिने झाले तरी कोणत्याही प्रकारे भाडे दिले नाही. पैसे मागितल्यावर आज देतो, उद्या देतो, असे सांगण्यात आले. त्यानंतर जाधव यांच्या वडीलाने कुंभार यांना ‘आमची गाडी परत द्या’, असे सांगितले. तेव्हा ‘नंतर देतो,’ असे सांगून वेळ मारुन नेली. त्यामुळे कुंभार यांनी मोटार आणि भाडे दिले नाही. यावरून ते फसवणूक करत असल्याचे लक्षात येताच जाधव यांनी राजगड पोलिस ठाण्यात जितेंद्र कुंभार व राहुल कुंभार यांच्या विरोधात फसवणुकीची तक्रार दाखल केली आहे. या तक्रारी नुसार गुन्हा दाखल करण्यात आला आहे.